Ахиран вахттари ппара гъургъубар ая хье Дагъусттандин назумчи Расул Гамзатован 100 ис хьуб бадала акьас ккея мегIракабурихъас, михъас лиркIен макьалабурихъас, шаирарихъас. Ме нубати ахттилат хьасе ме назумчи бадалди завал аркьа почтайин маркабурна открыткабурихъас хъара медаларна орденарихъасра (филателия, филокартия, фалеристика).
Филателия э инсанари гIешкъуни почтайин маркабур завал акьуб. 7-пе июньди 2023-пе иса адихьуная почтовый марка 100 ис бадала Расул Гамзатован, 63 манат агъай. Ме маркайик ишкил йирхIуная Максим Подобед агъа ишкилар ататти. Мисак йирхIуная Расул Гамзатован ишкил, кьабахъас аттархьагъилди дагьарара, хъара алтвея кьуркьара. Ме марка адихьуная 385 агъзур экземпляр.
Ме марка садпеф дава, ме назумчи бадала адихьунаф. 26-пе июньди 2013 иса адихьуфе садпе марка, Расул Гамзатован ерчIцIур ис верегунахъди адихьуф. Мин кьимат и 15 манат. КIилди адихьуне 120 агъзур экземпляр. Мисакра кея Расул Гамзатован ишкинра Святой апостолдин Андрей Первозванный агъатин орденра, ме ишкил йирхIунаф Алексей Дробышев агъа ишкилар ататти.
Хъара назумчин 100 ис хьуб бадала адихьуная садпе ягъан конвертра, 61 манат агъай, штемпельра.
Филокартия э гIилми открыткабур завал акьубахъас. Расул Гамзатов ишкил йиркIурал хьудегьен кеяф э гьер джурейин открыткабурик. Мебур кидавай, адихьуна уйи Iари уч кея открыткабура. Джалла мебур арайил акьу издательствобур аяфра Москвайиъ э.
Гьер са издательствойи гьер исари адихьуная открыткабур, сасадарик Iари Расул Гамзатов кеяттар, саебур михъай джуре назумчибура хъай.
Фалеристика э гIилми орденарна медалар завал акьубахъас. Садпе медал 2006 иса адихьунаф Расул Гамзатован фондуни Петербургский монетный двордиъ. Медалик са багухъас йирхIуная багвди гъузу суратин ишкил Расул Гамзатован, кIенаккди ттура ликIиная, сасра багухъ ликIиная «За заслуги перед обществом» пуна, хъара накьишра кея, гин кIенак учин номера кея. Ме джурейин джавизар ирцIанф хье хIуькуматинра сасра хIуькуматин инсанарис, культурайиъра, образованиъра, гIилмиъра, сад сайихъай арабур цIуппе аркьай, учин хIуькумат бадалди иджи курар акьуттарис.
Ме медаль йиттарин сандигI гIачархьуная: Евгений Примаков, скульптор Магомед-Али Алиев, Первый каналин хIаф Константин Эрнст, Рутульский райондин «Защитник Отечества» агъа ВПКйин хIаф Гасангусейн Абдулжелилов, музейдин директор Расул Гамзатован руш Салихат Гамзатова, хъара Дагъусттандин кьаваларин Союздин хIаф, Российин заслуженный деятель искусств, профессор Хан Баширов, Расул Гамзатован ттур але Хасавюртин библиотекайин хIафра Эльмир Якубов.
Агьал хIезур аркьая адихьас якьудпе медаль. 25-пе ноябрьди 2022-пе иса Дагъусттандин хIаттин Сергей Меликован Указилди маслихIет акьуная медаль фитикес аркьайчин. Ме акьуная арсуракес, Iудара багварихъас агъикIуна къирагъара. ЯIаник кея учин ишкил, кIенаккди назумчин къулра, джуре багун яIаниъ ликIиная «МЕДАЛЬ РАСУЛА ГАМЗАТОВА» пуна.
Батитай Габибулаева
