Гьер инсанди батIарди фикир акьучина хье дуяйил халкь хьунаядегьен шейъ, нахширар, IуькIер, тукар, фи кканчинара, джалла инсан бадалди э. Са ис, Iу ис дава инсандис ягIай варв фи ичин, фидегьен хайир кея нахшир ичин уч бицIиф ичира.

Садпеф уьт, гебури хьес ирцIанф ке иттеф джаллабурис кканвереф, уьт суман хъара милах, мум, перга, маточное молочко, варвдин икIуная хутIракей дарман э инсандин гьер джурайин итталарис. Iари са варвари фидегьен хайир ирцIанди ая инсандис. Хьин ликIенасе мум фи ичин, фитихъди, фиштти ге ишламиш аркьафичин хъара фидегьен хайир кейчин.

Ппара тамашин Iеламатин, хъара кьимат ая шейъ э мум. Аркьа мум варвари завал аркьай хвойный, лиственный кIурарин сок, хуппай гIачарта гебури чиппин хьирхь, верефе гикес тIубарик кихъва гIудулф суман буре ранг але шейъ. Завал аркьа гебури ппара кIурар ая мукьариъ гIулана тук ахъуная вахттуниъ.

Варвари мум ишламиш аркьа чиппин уьрегенари Iачар цIуппе акьас Iурдана мекI дахьас, сасра зарар кея нахшир дахьас, мерттвелис. Мум фидегьен варвдис лазим вереф ичин, гьегиштти хайир кея инсандисра. ГIелимарис агьалракей кIилди ягIар акьас хьуна адава хIекьдан фи ичин. Фас пучина мум чIир вереф, утIа зад дава, хъара куче акьучинра мумдик кея полезный шейъэр гуланфра дава.

Мумдихъас ппара ликIиная лап авалдин вахттари ая духттурди Авиценайи учин китабик «Канон врачебной науки». Мум уч ишламиш аркьа гьер итталис, гьергъилди. Ая ппара дарманар мум гIаяттар, аргIу мукьарил алихьа мум кея чапп.

Медицинайи суман косметологари ишламиш аркьа кремаригI, шампунаригI, зубной пастайигI, ая ополаскивателяр кьуркьар, хьамхьамар иттархьугуна хъударкаттар. Ппара хайир кея шейъ э мум, ягIай, духттурарифас хабар гъуршанди ишламиш акьучин.

Наибет Гасукаева