Хье хIуькуматин «Почта России» ме иса хаб гIачархьуная кIилди дуньяйин почтабурикес ке иджеттарин къадпе санаригIди. Ме маслихIет акьуне ВПСди. Мебурин ахттилатарилди, са вершна ерцIурна Iу иштаракчибурикес хье хIуькуматин идарайи къадпе мукь фацуне. ВПСдин комиссиъ ме кар ахттармиш аркьа якьу кьайдайилди:
ЭхIттибар хъахьуб (гьер са зад рукьубан тегIдевел, дузвел ягIархьуб);
Ме сетьдин хIавел (джуре хIуькуматарихъай алакъа, миллатарин арайиъ ая алакъабурин кьадарар);
ДжемеIетин арайиъ магьшурвел (идарайин курарин гереквел фидегьен ичин, найисариъ фидегьен отделенибур ме идарайин айчин);
Идарайин цIуппевел (фиштти мебури духIубавелар гъадивай ичин).
Алттушу исахъ хъуттурфуна, хье почтайин идарайи учин кардин иджвел алтухъ акьуная ме иса 63,6 баллдилас 67,7 баллдилдегьен. Гьелбетта къадпе мукь лидегьен хIа давайчира, хьин шад э ме мукьуйил. Фас пучин, са вахтт хьуна уйи почтайин кумак гьелемела ишламиш аркьай андаваф.
Ме иса ВПСди арайил акьуне миллатарин арайиъ почтайин базарин группабур. Российин почта мебури гIачихьуная еридпе группайигI. МисагI гIая алттушу иса чиппин пешакарвел агвар акьу операторар.
КIвал акьучин, кIилди дуньяйин почтайин союз (ВПС) джалла хIуькуматарин идара э. Ме идарайи джалла дуньяйин хIуькуматар сад аркьа.
Хье Агъул райондин идарайин кар фиштти кIили гъайчин, час ахъакьуне идарайин хIатти, Гасанов Гасан Гусейновича. Са агъзурна ерчIу вершна ерчIцIурна садпе исан августтин вазахъас мич э Гасан Гусейновича почтайиъ кар аркьай.
«ХьибцIур исалас вартт э зун мисаъ кар аркьай. Зун кардил хьу вегIдайи хье идара Хеварил алчихьуна уйи. Хабди хьинра Хевара хъай алчихьуне КьасумхIурил, хабди джалла хъай алчихьуне Магарамкентский райондил. Магьа хубджи исаре Магарамкентихъай хье ариш – вариш ай. ЯгIайин ягъас са усал акьуная муя райондин идарабур. Ахтынский, Рутульский, Докузпаринский, Магарамкентский, Касумкентский, Курахский, Хивский, Агульский районарин кар мехIкамди аркьа Магарамкентский Почтамти.
Удигьай гьер ягъа гъареф и хье райондиди. Хабди са Iу исари хьуне хIефттайи хьибу ягъа гъай хьуне. Хуппай хаб гьер ягъа гъарегъилди акьуне. ЯгIайин ягъанис элхIед ягъа кидавай, хIефттайи ерхьи ягъа ве хьехъди почта.
Почта пугуна, мисаъ аве посылкабур, кIеджар. Кьабул аркьа чин налоговый вычетар, Iекварин пулар, вахтт вахттуниъ ай ирцIанде пенсибур. Хубджи инсанар хьуная райондиъ почтайиас пенсибур гъуршанттар. Гьелбетта че кардисра иджвелихъди ве ме инсанарин кьадар алтухъ хьудегьен. Хьибу вершна ерцIур инсанди гъуланде Почтаихъ эхIттибар хъихьуна че идарайиас пенси. Фас пучин, вазалан еридпе ягъалас ерчIудпе ягъалди рукьагунас ирцIанде. ДехIела джемеIетра рази э. ЛиркIенде чин хъара газитар, журналар», — ахъакьуне Гасан Гусейновича.
Мин ахттилатарилди, кар аркьа кIилин хье райондиъ цIемуя инсанди. Мебурикес Iу операторна почттайин хIаф аве Типпигъарин идарайиъ. Iуд ая Типпигъарин хIурин почтальонара. Аметтар гьер хIурариъ ая почтальонар э.
Четинвелар фишттинттар ая пуна суал йигуна, Гасан Гусейновича джуваб акьуне: «Четинвеларихъас гъургъучин, ягIайин ягъас алтухъ адава. Амма ке герек иде кар э газит э, журнал э ликIиб (подписка). Гьал хье инсанари алтухъди мебур ликIенас алучIайдава. Зе фикирарилди, ме кар асулу э телефонарилас, компьютерарилас. Мисариъ учIухаб, гьер са инсанди учис герек иде хабар хIеракат акьуна джиркIенде. Подписка гулучин почтальонарин кара гуланасе. Почтайин тич мич ариш – вариш ппара хьудегьен че важибра алтухъ ве».
Ппара тамашин кар э ме. Кьабул аркьа мебури посылкабур ке илгунттилас хъучучIуна къа килавин къикъевел хьасттегьен. ТегIди – хIелди файшуна ккане заказнояр идехаб хъара ппара къакъ аяттара. Кьиматра мебурин асулу э килавариласра рекъуьн вархавелдилас.
«Зе фикирдилди, интернетар хьухаб зайдайи мугьлатара ппара хьуная инсанарис. Хулаъ экьуна фи кканчира гъуршанде. Хабди посылка рекъуъ аягунара штрих коддилди алгъузанас ве учин шейъ найич рукьуна айчин, мус рукьайчин. Заказ адехабра, нагагь иджи кьабул давайчин, пул фадавайчин заказ акьу шейъ хаб гьикасра ве.
Са чIалалди, Iурд, гIул дапуна, джемеIет бадалди лиханде почттайин пешакурар. Час кканеф инсанарин разивел э че кардил!», — хъара пуне ми.
Салихат Малагусейнова
