Ис исал рукьагунас хIаягъар ппара алчархьа. Гьер са хIаягъахъ хъая учин гIедатар, тарихар. Агьал багу вея ЦIае исан хIаягъ. Джалла: хIаттара, бицIиттара, — гъузуна аве ме хIаягъахъ. ХIаттарин умуд кеве цIае исаъ иджвелар, шадвелар хьасе пуна, цIуьре исахъай четинвелар, итталар, Iайвелар алттвесе пуна.
Гьер исан аве учин иджвелара, Iайвелара, четинвелара. Са ис сасра суман вейдава. Амма ттиан ис джурейи четинф хьуне инсанарис. Гьерттин учин ая четинвеларихъди, инсанарил хIевалат хьуне кьацIра ибурис ундихьу иттал — коронавирус. Ме иттал Iари инсанарис дава киркьуф, мебурин джибинарисра киркьуне. Карантин акьуна инсанар хулариъ экьуф, ппараттаривас фаттархьуне хIуькуматин курар, хъикIас алчархьуне инсанарис чипис чара аркьай дахъуная дуьканар. ХъикIуне бицIи суман идарабур. Манативас хьуф инсанарин кар четин хьуне.
Гьеме кардихъас ме иса ахттигьар йина адава акьас инсанар садихъди завал вере тамашабур, концертар. Мактабариъ гьертти чиппин классариъ аркьая бицIи суман хIаягъ. Гьемиштти садикариъра э. Бабарисра, алтухъ инсандисра ундахъуна чиппин арайиъ аркьая хIаягъар.
Амма ЦIае ис хъучаверегуна инсандин йиркIв гъузуна аве иджвеларихъ. Iайвелар, итталар илгурай агъай цIуьре исаъ. Ме ягъас инсанари аркьа гьер джурайин хIезурвелар, батIар IуьтIубар. ХIаттар далара шиникквар Iайи гъузуна аве ме ягъахъ. Мебурис кканеф тамашабур э. Iайи кканеф шиниккварис хлопушкабур чурхъай бахъар акьас.
ХIаттарира, алучIа гьертти учин валадис кканеф акьас. Удигь кIил чаб хьуна гъуланде гьер джурайин хлопушкабур, завариъ агъарта фейерверкар. Шиниккварира ягъар-вазар ккими башламиш аркьа фачархьу манат фай дуьканди вей гъушанас гьер джурайин хлопушкабур. Агьал дуьканариъра ая мебурин ери джуре. Шиниккварин чиппин арайиъра аве бехIс найихъ ппара хъайчин, хIаттар, Iайи бахъар аркьаттар, ун хъаттар, тамашингъилди чурхъаттар.
Тамашабур суман Iайвелара ппара кея мебурик. Шиникквари чиппин нашивелди, гъавурдиъ адавай, гъуланде хлопушкабур, амма хIаттарин вазифа э мебурин иджвел-Iайвел ахъакьас. Дуьканчибурив фахьуна кканде мебур масса йис ахттигьар ая кIеджар. ХIаттар хъудавай адина бицIиттарис мебур йина ккандава.
Гьер джурайин курар алчархьуттар, зарар ппара йиттар ая мебурикес. ЦIа кихьуна фадихьас хъучадархьуна гъиларигI чурхъуттар, тIубар гьадахъуттар, хулариъди ачархьуна цIабурар керхьуттар, IуькIеригI гIархьуна угуттар.
Гьемишттин нехIс курар алчадархьас хьин алгъузуна кканде шиниккварил. Хуларигьас, саларигьас, мухIаригьас, хъара сасра инсандин джигагьаригьас вархалди гьайчIуна кканде мебур чурхъагуна.
ДагIайдава хIа инсанари агъаф «НехIс вереф сагелай э».
Луиза Гусукаева
