Ме нубати зас ахъакьас кканди ая муфеIэт кея IуькIерикес са IуькIуьхъас. Мис Iуьрус чIалалди агъа «Иван чай». Ме IуькIухъас ппараIди ягIайдава инсанарис. Хьес дагIа дарман кея IуькIер ппара ая хье чIирариъ, амма хьес дагIавелди хьин ахтармишра аркьайдава.

Уч ме чейин IуькI гьучархьа джалла мукьариъ, ке Iайи алчархьа хьеттин багулив, Iуьрариъ. Агубарис ме э са митIри аледегьен ирхе дар, икке ирхе суман цабара кей, бил-бил джагьрайин рангунин музе тукара алеф. Ке цIайи ме IуькI арайил хьуне цIеIудпе асирди хье хуькуматиъ, хабди сасра хIукуматариъра. Са вахттуни индийский чейин кьимат вартт хьуна ме чейин IуькIер гIадикуна уйи базариас. Гьал бицIи-бицIи инсанар гъавурди архьая гик кея муфеIэтин. Ме кардихъас пичин мик ппара витаминар кея.

Ме IуькIуькес акьу чейик ппара дарман кея, ацIуна итталар сагъ акьас. ХIел-хIел аркьай ухахаб кумак ве кIилиъ Iуьр аркьагуна, давленибур вартт гъайшигуна, къарфуни Iуьр аркьагуна, хъара сасра итталарикесра.

Ме IуькIуькес чей акьасра лидегьен рехIет дава. Сагелай ушуна, адаркуна, завал акьуна кканве, хуппай хулаъди файдехаб кертIа цIабар, архъа са балуниъ, батIарди Iуьрджанди, цIабариас Iаш айчIвастегьен. Хуппай архъай тIабакIиъ рукъас аркьа духовкайиъ ерхьцIур градусилди гъадивуна. Аттивухаб ге гъазе цIабар, хъучадивуна кIаре ве, ухшар ирцIанде хIекьдан чейин IуькIерис. Хъара иджи хIисаб аркьа цIайил рукъас акьухабра, гиштти рукъугуна ге IуькIуьк витаминар ппара кимилгванде. Рагъугь рукьас акьас кьацIра кедава, эл ата сарин мукьуйил дала.

Микес акьу чей ухасра нуш ве, фидегьен ухучинра, даккан аркьайдава. Амма алтухъ ппара ухубра иджи дава, гьер са заттин къайдара ягIай кканде.

Хье чIирариъ ая девлетар инсанди учис иджвелихъди ишламишра аркьа.

Батитай Габибулаева