Хье дунья агьал фацуная коронавирус агъа иттали. Ягъалас ягъа гъайшая сан иттаттарин. Хье хIуькуматиъ са Iу ягъан арайиъ хаб гъайшиная ме иттал, 29230 инсандис са ягъа хьуная коронавирус. Дагъусттандиъра ягIайин ягъас иттал кея инсанарин сан хьуная1602 инсан. Ая кIеттар, хъара ая сагъ хьуна хъатуттар, минздравдин сводкабур духIуба ве гьер ягъа. Хъара ТАССди хабар йине мэрийин пресс-службайин хIаттис Луиза Ахмедовайис Каспийск шагьурдиъ са инсандис хьуная пуна ме коронавирусдин цIае джура «омикрон» агъаф. Миштти четинвелар хье дуньяйиъ аягуна, руб йирхIуб садпе кумак э гьер инсандис ме COVID-19 агъа чIирхIе иттал ппара бадил дахьас.
Ме итталихъас, хъара фишти уч-учин кIилилди ме итталин руб йирхIас кьастт акьунайчин учи, чин хабар гъушуне Миссиарин хIурин мегIелим дишегьлифас Гаджиева Тамам Гаджиевнайифас.
— Ассалам Алейкум, Тамам Гаджиевна! Фиштти ая чве джандин сагъвелар? Ахъакь час, фиштти чун разивел йинайчин ме коронавирус агъа итталин руб йирхIас.
— Ваалейкум Салам чвасра, чве редакциъ кар аркьа илдешарисра, джалабурис сагъвелар хьурай. Зе Iуьмурдин яш хьуная 66 ис. Махьтабиъ кар аркьай хьуная 46 ис. Агьалдисттегьен зе Iуьмурди зас мишттин итталар, итталарин четинвелар хьуф дава. Ппара четинди ая хье дунья ме итталихъас. Цац февральдин вазала зун иттархьуне. Са Iу хIефттайинди зунра зе хизанра уйи джуре акьуна инсанаригьас.Удигьай, ме иттал бадил хьастти, вахтт гIартай вахттуни чин вейи сагъвелдихъ хъуттурфанас хье райондин больницайиъ. Фас пичина, хIуькуматин кардил алди ая инсанар э чин, хъара къадагъа бадалди. Са ягъа час хабар хьуне хье райондин больницайиас чин иттая пуна, че коронавирус агъа иттал кейчугвас ахтармиш акьухаб. Иттар хьуне чин Iудара. Гьер ягъа йиркIв алиянди уйи чин хье дуньяйиъ ая хабарарил ме итталихъас. Са вахттра дахьуна хье райондиъди файдине ме иттал дахьас ата рубар. Чин Iударира кьастт акьуна ушуне больницайиди руб йирхIас. Амма час духттурари пуне ерхьи вазалан вахтт гIайшуна кканди э пуна ме итталин руб йирхIас. Руб йирхIа вахтт хъучаверегунас, июльдин вазала зун хаб иттар хьуне. Хъара Iуд пегелай духттурари пуне йиркIвар-лекIерин 30% зиян ая пуна, ахъухьас акьуне хье райондин больницайиъ. Дузди пучин, ме Iудпегелай са бицIи гучI хьуне зас ме итталигьас, фас пичин, хье дуньяйиъ ая хабарарил йиркIв алийигуна, хIапай ме иттал читин вереф хIисаб аркьа 60 исарилас вартт яшар хье инсанарис.
Хъара ппара Iайи читин дахьуна алттархьуне ме чирхIе иттал заалас. Алттушу исан октябрьдин вазала зунра зе хизандира йирхIуне «Спутник V» агъа Iу компонент ая дарман ме COVID-19 агъа иттал час хъара дахьас. Че Миссиарин хIуриъ чин садпеттар хьуне 60 исалас вартт хьуттарикес руб йирхIуттар. Руб йирхIуне пуна са фера хабархьундава е садпегелай, е Iудпегелай. Хъара зас пас канди ая- йирхIуф ме руб чин че кIилилди э, чин хъучикундава е махьтабин хIатти, е хIурин хIатти, час ме кардихъас са чIал пундава. Зун махьтабиъ шиниккварихъай кар аркьая мегIелим э, зас зе илдешар хула ая хизанар хIисаб э, махьтабиъ ая шиникквар зе хуттулар э. Захъас суман фикир акьуна гебурихъасра , йирхIуне зунра зе хизанди ме итталин руб. ЯгIайин ягъас зе сагъвелар иджи ая, агьал чин хIезурди ая, вахтт хьугъилди, ревакцинация акьас.
Наибет Гасукаева
