Ягъа Махачкалайин аэропортиас МЧС Российи гьикуне 30 тонн кумакин Полестинайин халкьдис, ме кардихъас хабар йине учин телеграмм каналиъ Сергей Меликова.
«Зун ппара рази э Дагъусттандин халкьдил, мебурин идже йиркIварил. Хьес мусра афттавуй сасрайин дард, джуреттарин шиникквар, адава дард кея  Iуьссеттар, хумбар. Фи вахттари хьучира хьин агвар аркьафи мишттин шартIар. Хье Республика удигь гьая гьикуная кумакариас СВОйиди, хъара кумак акьуне джилар ттуттугуна Сиридина, Турциди, гьал ягIа джаллабури сад хьуна кумак аркьая Газайин халкьдис.
Тисаъ фитна гъайши ягъанилас мич Дагъусттандин Муфтиятихъай руцафи чин фиштти кумак аркьай ичин халкьдис. Ме арайи час джикIине, зе фикирарилди Iуд ке идже кумак вере курар, сад — джемеIетин дуьгIе, Iудпеф — сурсатарин кумак.
Ме курарихъас зун гъургъуне Российин МЧСдин хIаттихъай. Агьал ая читтинвеларихъ хъуттурфуна са фикира хъудавай рази хьуне мебур Полестинайиди кумакин борт гьикас.
Ме кумак чин завал акьуне джалла республикайин кумакилди. Хье джумарт меценатар хIезурди уйи сасрабурил алчадатуна йис ме гьикая кумакин кьимат, чин мебур гъавурдиъ ихьуне, джаллабурисра кканди уйи бицIиф ичира гIачихьас, дехIела гьерттис хьуне мункинвел ме иджвелин кардигI гIачучIас. Хье республикайин фондари «Инсан» «Чистое сердце» агъаттари ме кар арайил акьуне гьерттивас чиппин гъилихъаяф йис верегъилди. Верш манатилас башламиш акьуна хIа манатарихъди рукьуна гьикай са чIукь вахттунин арайи завал акьуне герек иде манатар.
Ме са чишнасара э хье халкьдин садвелдин. Ме иджвелин кардигI гIачучIуне духовенство, предпринимателяр, хIуькуматин курарил алеттар, аме джуре инсанара ме кардихъас йиркIвар руцIаттар. Джаллабур гъам кей алгъузуна ая Ближний Востокдиъ вея курарил.
ДехIела ягIа Газайиди гьикаяф Iари Iеле сурсатар, кунар, руб-дарман дава, мебурихъай хьин гьикая хье гьерттин йиркIуран са пайра», — агъая ме ахттилатиъ.
Дагъусттандин хIатти пуне, кIилди Дагъусттандиъ завал акьуная 100 тонндилас вартт кумакин. Вере вахттари хъара гьикасе мишттин кумак.
«Зас ягIа, хье диндин чуппарис акьу кумаки хабар йисе, агвасе чаб садтти даваф аяф. Хьин гьалдин хабра акьасе дуьгIебур мебурил але зулумар ккиркIвас», — пуне Сергей Меликова.
Луиза Гусукаева