Джаллайисра ягIа хье Дагъусттан ппара миллатарин ватан идеф. Гьер миллатихъ учин тарих хъая, бина чIал, гIедатар, аркьа хIаягъар. ХIаягъар ая гьер миллати чиппин райондиъ аркьаттар, ая кIилди Дагъусттандиъ аркьаттара. Сад мишттин хIаягъарикес э ХIидин Iуьш. Гьер миллатин ттур джуреф э ме хIаягъан. Ме хIаягъахъди джалла миллатар хIезур ве вахтт кими.
Ме кар бадалди Махачкала шагьурдиъ хьуне хьид хъучадибан «Возрождение» агъа хIаягъ. Ме мегIрака арайил акьуне Дагъусттандин Министерство культурайи, Республикайин дом народного творчествайи, мисаъ ишттараквел аркьай уйи республикайин муниципальный образованибур, хъара Дагъусттандин культурный наследин отделенира. Мич адина уйи гьер районариас чиппин тамашибур фай. Гьер миллати хIезур акьуна тамашибур агвар акьуне Русский театрдиъ.
Гьеме кIилди районаригI гIуйи Агъул районра. Мич ушуна уйи хье райондин Дом культурайин работникара. Мебури хIезур акьуна уйи хье бинайиас ая хIидин Iуьшуй аркьа гIедатар.
Русский театрдин сегьнайил мебури агвар акьуне хьидин Iуьш фиштти башламиш аркьай ичин, агвар акьуне мегIнибур, лехъунар, маргутра алдишай дурхIай, агьийине куче- муссу, язанар аркьай, хуппурар узайра агвар акьуне, хъара фиштти сусак ишанар кихьаф ичин хьидин Iуьшан ягъа. Ппара батIарди дитIуна, аликьуна авал заманайин кунара: дишагьлибури махпурин берхIемара, алахъуна келагъанарна харалачикара, лекарил гвегIенара, идемари аликьуна валджагъарна бармакара, гIунариъ ихьуна джикъе ккулара, лекарил мехIсарара, ухьттанди агвар акьуне чиппи хIезур акьуна номер. Мич файдина уйи мебури авал заманайин Iелетара: бакъукъ алгьату арджирар, рекъуьнар, гъурагъалдин чIакьафирар. Ахирахъди чиппи файде Iелетар мебури алайшуна сегьнайилас тIем акьас йине залдиъ ая инсанарисра. Джалла экьуна хъуланттар рази хьуне хье Дом культурайин пешакурарил, чиппин кар зигьинлудалди агвар акьуне гебури.
Чиппис Дом культурайин пешакурарисра ппара кьабул э ишттараквел акьуб мишттин мегIракабуригI.
«Час ппара кьабул э че пеша. Мишттин мегIракабуригI чин са усагIна Iу усаъ дава хьунаф, гьер иса, гьер са хIаягъ акьас вереттаре чин гьер усариди. Тич-мич хъай вередегьен тамашибура ппара ве, хъай кар аркьаттарин арайиъ нуьхIуьбат, хIуьлматра цIуппе ве, хъара сасра миллатарин инсанарихъайра танишра ве, гебуринра гIедатара ягIарве. Са бицIи суман рекьериь бизар вей э, амма сасагелай рекъ ушуф суманра кехIей вейдава гъургъай, зарафатар аркьай верегуна», — пуне Дом культурайин работникди.
Ахирахъди ме мегIракайигI гIадегьенттарис йине Дагъусттандин Министерства культурайин дипломара.
Батитай Габибулаева
