Кисарин Аслан э IехIмаданра ХIуьрина шиниккв. БицIигунанхаб кар аркьай вардиш акьуне Аслан учин дадана баба. ХIуппарихъ, маларихъ вей нубатарин, чиланарин, совхоздин, учихъай вардиш акьуне ме IехIмада. Фи кардик хьучира хIав ккея шиниккв и Аслан. Махьтабариъ амегуна димари ги ппара кумакар аркьайи учин багу кIиларисра, ппара кумак аркьайи учин Кьулбан ададас. Адад и нисар аркьа заводин хIаф Агъуларин райондиъ. Ге заводиъ ппара кар акьуне Аслана учин багу кIилинттара хъай.
Махьтаб ккиркIухаб, ушуне ге Калининский областтин Лилидово агъа шагьурдиди мастер-сыродел агъа курсар хурас. Гевус ккиркIухаб кар аркьай хьуне Калмыкиъ мясо-молочный заводиъ. Тидас ушуне ге буругъарихъ кар акьас Туркмениди. Тисариъ лидегьен ппара гагь мин хьуна адава. Хаб адине ме хIуриди, акьуне учис са хизанра Саимат агъаф. Ге э кисарин Мазин руш. Саимат Асланалас са исанди бицIиф э. Са Iу иса илгуне мебур кар аркьай нисар аркьа заводиъ хIуриъ. Саимата кар аркьай хьуне отдел кадровдиъ «Тпигский» совхоздин. Хабди хъай Iудара хизанар ушуне мебур Ставропольский крайдиди, Балковский совхоздиди Георгиевский райондин.
ЦIайи ушу вахттари мебур кар аркьай хьуне ге совхоздиъ — Аслана скотниквелди, Саимата урчарихъанвелди. Чаб самуз арайил хьугуна, гъушуне ми учис малар, хIуппар, джилра, хьуне микес фермер. Саимат экьуне хулаъ, Iелеф-ухафра аркьай учин хизанарис. АцIуна исари илгуная мебур Балковкайиъ. БатIарди дуламиштти уйи мебур. Чиппин багу-кIилинттарисра кумакар аркьай хьуне мебури.
Асланахъна Саиматахъ хъайя Iу рушна са кIиркI. Гебур дуьхьуьна сакинра акьуне гебури.
Чиппин яшара хьухаб, джала шиникквара сакин акьухаб, адине мебур хаб чиппин ватандиди кIиркIра хъай.
Тисаъ кар аркьай вардиш хьуттар, мисаъ кар даркьай экьвас хьуна адава мебуривас.
ЗулерхIурихъ, даркуна гекттар дегьен джилра учин тарахттурдилди, азман мукуйиъ узуне мебури кьутIар, каламар, калтуфар. Акьуне учис гьелисаъ рехIетвелара. Дивуне азман манзилиас хьедра алихьас учин узу мехIсулил. Шиникквдира ппара кумакар аркьа дадасна бабас. Ппара загьматар дивуне гебури джалабури ле хуппурихъас. ГIулди гъил фаттивундава хуппурифас, чIал аркьай, хьед ирцIанди, мелехъвар алттивай, дарманар ичай. Ппара загьматар дивубалди, мехIсулра батIарди завал акьуне мебури. Ке батIарди хьуне мебурис кьутIар, са азманар. Хабди каламар. Каламар бицIи хьуне агъайи Аслана, чиппи кьанди узухIела, хIел дагIай мисан. Хъара калтуфарилра разидава Аслан музе хьуне агъай.
«Сасра иса хъара батIар мехIсул гъушанасе зун зе джилилас. БатIарди, юркI фай лихугуна, фи кканчира кегъучIа хье хIуриъра. Ставропольдиъ суман дава. Загьмат ппара э. Iайи джафа акьуна кканве, хъуттурфун кканве мехIсулихъ, вас дул алчадин кканчина. ХIуппар, малар ухIасра ппара загьмат э хье хIуриъ тисаъ дала. Чара адагуна, фи кканчира акьуна кканде», — агъа Аслана. Гьемишттин зурба инсанара хъая хье агъуларихъ.
Нафият Шамсудинова
