Кьамарин Шабанов Шабан хуная 1906 иса Типпигъарин хIуриъ. Гебур ппара тушкин исар и. Инсанар ппара гIеджизди дуламиш вей уйи. Уч хIа хьухаб, ги учин дуламиш батIарди акьуне. Кар аркьай хьуная колхоздин председательдин заместительвелди, хIуппарин бригадирвелди, джиларин бригадирвелди. Гин хьирас агъафи Ашура. Ге хуная 1912 иса. Шувас гъарегуна Ашурайин хьуная 13 ис. Файдин сасра ягъадимари гIачикуная ге салагI. Те вахттуни ппара куппар аркьай хьуная. Малара ппара ухIай хьуная. Са бицIи фурдинфракегьей фадихьай хьуна адава.
«Шувас файшугунан хаб мич, 13 исан рушан, утунихъас фурдакI кам хьуф дава гин. Колхоздин хуппуриасра, урчарихъасра кам хьуф дава», — ахъаркьа гин чIалар учин ху шибери.
Кьамарин ШагIбанара Iешурайи хуна, ухIуна хIа акьуная ерхьи шиниккв: хьибу кIиркIна хьибу руш. БицIи ами хугъилди кIиттара хьуная. Ге шиникквар ппара хIабабахъай суваъ авей хьуная. ХIабабас Загьра агъафи. Ге малара фай гIулана суваъди вейхьуная ччамар, нисар акьас. Гихъай джала шиникквара вей хьуная суваъди. ХIабабакес хъел акьугуна, гьишина вей хьуная гебур хIуриъди, пуна хIабабас чIалара.
Ке хIа кIиркIас агъафе Курбан. Ге хуная 1933 иса. ЙицIудпе класс ккиркIухаб ге файшуная армиъди. Армиас адихаб ушуная Iуьрусаттихъди хурас высший милицейский школайиъди. Ге ус ккиркIухаб ушуная Бабаюртиъди, следовательвелди милицайиъди. Тисаъ гIачархьуна хумбарин фитнайигI адикуна адиная хIуриъди. ХIуриъ совхоздиъ ацIуна мукьариъ курар акьуная. Хабди хизанара хъай айчIуна ушуная Ставропольский крайдиъ. Ахирахъди хаб адина экьуна дуламиш аркьай хуная хIуриъ. Шабанов Курбан кIине 27 апрельдиъ 1921 иса.
Iудпе кIиркIас агъафе Гамид. Ге хуне 1938 иса. Мактаб ккиркIухаб файшуная армиъди хIуьлилди якьу иса. Хабди ушаная хурас медучилищейиъди. Хурун ккиркIухаб са-Iу иса кар акьуна, хаб ушуная хурас Махачкалайиъди ветеринарный университетиъди. АцIун исари кар акьуная ветстанциъ. Ахирахъди хуруна лабораторный курсара, кар аркьай хьуная райондин больницайиъ. Шабанов Гамид кIине 29 июльдиъ 1920 иса.
Хьибудпеф руш э. Гис агъафе Айша. Ге хуная 1941 иса. Ке Iайи гаш, мекI ая иса.
«Пул айчира гуни гIачархьайдавуйи. Мукулсуна гъуршанди час са гуни. Гьегера пай аркьайи часра ХIесанарис. Гебур ятумар и. Пай маркьа агъайи Кьулбана. «Джан бабан, чвахъ дадра бабчира хъая, гебур ятумаре», — агъайи баба гис. ХьеттигI гIахъуна кьелра аркьайи кьебзур. Гик кетай гунира Iелди, муталик кетай Iелди. Са ягъа суваъ агуна хIабаба пуне Кьулбанас: «Зун адавея хIуриъди, вун акьуна неккна мусу тин гебурис». Ги час гIахъуна неккдигI гIур йине. Чин фи ичин дагIай IуьтIуне ге. Адигуна, агуне хIабабас че хъамилгунаттар, алухIуне гихъай. Кьулбан хъел акьуна, агъай хIабабас чIалара адайшуне хIуриъди. Зас ппара кканверефи багунттарин хулариъ Iуьшар акьас.
ЙицIудпе класс ккиркIугъилди, Iемалара акьуна, хурас гьикасе пуна, йине зун шувас.
Кар аркьай хьуне зун парткабинетиъ, са-Iу вазариъ редакциъра хьуфе зун кар аркьай, са чIукь гагьди хьуне хIавел аркьай садикдиъ, хаб ахирахъди адине парткабинетиъди», — ахъаркьа Iейшайи.
Якьурпе рушас агъафе Гурипери. Ге хуная 1944 иса. Еридпе класс ккиркIун ушуная ге Дербентиъди педучилищейиъди хурас. Фи хьуфчира дагIай, дахурун гьаге усра хаб адиная хIуриъди. Гъушун аттестатра йиная ге дада шувас, са лезги идемис, Iеликъули агъаттис, Агъул райондиъди гьикунаттис санэпидстанциъди главврачвелди. Iеликъули йине Гуриперис кар гисаъ машинисткавелди.
ГIуьфудпе рушас агъафе Гури. Ге хуная 1951 иса. ЙицIудпе класс ккиркIухаб хьуная сагелай районойиъ запасдиъ ая магIелимвелди. Хабди ушуная Махачкалайиъди бухгалтерарин курсар хурас. КкиркIун адихаб, кар акьуная колхоздин бухгалтервелди, хабди Госстрахдиъ бухгалтервелди, сберкассайиъ, ахирахъди Пенсионный фондуниъ.
Ерхьидпе шиникквдис агъафе Джамалудин. Ге хуная 1954 иса. Мактаб ккиркIухаб, ушуная хурас Махачкалайиъди бухгалтерарин курсариъ. Ама ге пеша акьундава ги кьацIра. Ушуная птицефабрикайиъди механиквелди. Хабди айчIуна учин хизанара хъай ушуная Ставропольский крайдиъ. Тисаъра ги кар акьуная птицефабрикайиъ механиквелди. Ахирахъди хаб адиная Красноармейскдиъди (Махачкалайин багулиф фаяф) птицефабрикайиъди.
Кьамарин Шабанов Шабан кIиная 1988 иса. Хизан гин, Ашура, киная гилас йицIу исан удиъ 1978 иса.
Джалла кIидегьенттарин гунагьарин гIефу акьурай чиппин, аметтарин джандиъ сагъвел кам дакьурай, йиркIурас рехIетвел хьурай!
Нафият Шамсудинова
