Фи кардис хьучира гIул идже вахтт э инсандис. ГIулана джурейи джан ачухъ ве. Саддалара ибгIа идехIела ппара кканве исан вахттарикес ме вахтт. Мегуна дуньяйин гьавара батIар ве, гъаз алатIуна джалла усарил. Булди ккане джурейин емишара аве.
Емишар суман, хъара идже гIулин ширин шейъ ая, джаллабурис — хIаттарисра, бицIи шиниккварисра нуш идеф – мороженое.
Мороженое ке Iайи IуьтIанас алучIафра гIулана э, ругъу шейъ идехIела. Ругъуф суман, уч ппара ширин задра э. Ширинди идефра шаккарикесна неккдикес акьунахIела э. Авалан вахттари гьал суман ппара джуребура адавуйи ме мороженыбурин. Гьал тIемара, ттурара, агубара гьер джурейинттар хьуная. ТIемарихъас гъургъучин, мебур акьас алучIа гьер джурейин емишар гIахъуна, хевар гIай, шоколад гIайра аркьа. Агубарилди ая: кIуранил алеттар, вафликесна кардуникес акьу исттиканнариъ аяттар, хъара мебур ая са килав атара.
Агьал гIерттис мугьлат ая учис ккане суман мороженное гIативуна гъушанас. Авала шагьурариъ фачархьучира, хIурариъ авейдавуйи мороженыбур. Гьал ккане суман джурейинф гъушанас ве. ГIулин куче ягъари хIел-хIел аркьай IуьтIанасра кканве самуз сарин хьурай пуна. Сайишти мик муфиIет кеяфра хIисаб аркьа, неккдикес акьунаф идехIела. МигI гIая инсандин джандис герек макроэлементар: кальций, магний хъара калий.
Амма са багухъас иджи ичин ме Iуьтуб, джуре багухъас зарар ирцIан вахттара ая ме IуьтIуна. Сасадарис мин ширинвелди джандис зарар кея, сурис ме IуьтIухаб иттар хьубан зарар ая. Ме IуьтIубан къадагъа але инсанар ая:
кук вере джурейинттар, гIанар-джанар иттатар, сахарный диабет аяттар, холестерин вартт идеттар, хъара давленибур аяттарира эхIттият акьуна кканде.
Алдавай ппара мороженый IуьтIухаб, ве кьуркьар иттатар, мухурар хъархьаттар. ЭхIттият фай Iелеттара ая.
Хъара силебарин духттирари агъа, мороженое IуьтIуна са вахтт ккетдушуна куче чаяр, кофебур ухас алмучIа пуна. Фас пучин, садпуна ругъуф, кучеф силебарис киркьугуна, силебарил але эмальра чIирве, хъара музе хьилар ушубра мункине.
Эгера учис дюхьуь ругъу температура дахьухаб, ухIасра читтин задра э. УьцIухаб некк хьуна гIачавейра э.
ХIаттари фидегьен эхIттиятар акьас алучIучира, бицIи шиниккварис мороженое ами фера кканвейдава. Чиппис манат фачархьугъилди гьуккай дукандиди ве йиркIурас ккане ширин мороженое гъушанас.
Батитай Габибулаева
