Iу хIурин арайиъ
Зурба хIа сув айи
Iудар хIурарин арайи
ХIуьлмат нюхIюбат айи
Ле сувал Iу хIуппахъан айи
Iуд Iу чу суман левур айи
Са хIуппахъан джигьилф э
Сасра яшунин гилас хlаф э
Iуьмар хиял кедавай
ЕрхIай суретI ягъ фаттатай
Заварил але лаIари
Суьретихъди лихъун акъай
СуьретI ли ерхIугуна
Джейранар лихъвайра айи
СуьретI ми ерхIугуна
Улусумари зил фихьайи
ХIуппакъанар багу хьуне
Ахттилатар ерхе хьуне
Хаварарикесра гьирхуне
Ае хаварар ахъакьуне
Махlмуда джигьилас агъай
Багагь хIури цIакин ая
Зун ле вас шав агъая
Iудар хъай хьин алагIвая
Iуьшакес ягъ акьуна
Iуьмар халади адине
ЦIае канар гъушуна
Хав сувалди ушуне
Сувалас алайине
Халади ра рукьуне
IуьтIув ухув акьуне
ЦIакIинилдира ушуне
Iумар вархал гъузуне
Тамади мукъ акьуне
Тамади тIул дагъуна
Лехъунира айчIв пуне
Iуьмар лекъуни айчIуне
СуретI гъили гъушуне
Iуьмар лекардал ликъвая
СуретIил тIувар ликъвая
Мин зурбагIвал агуна
Халкь махлукь гъайишине
Михъай лихъвае рушас
Халкъди шабаш акьуне
Са джигьил варха хьуне
Мис ме кар даккан хьуне
Халади джигьил адине
Дадасра ми упуне
— Дад бидад, миннат э вас
Фачете рушан дадас
Хье хала ае къизилна арс
Руш канди ая ме зас.
Къизилна арс гIачахъуна
Алахъуне суфрайилра
Рушан ахттилат акьуна
Ишан кихьа ягъра пуне
Дада пуне гадайис
— Вун ях геда базарис
Гъуше кканеф хье сусас
Шайар гIваеф хье халас.
Базарисра ушуне.
Шайара ми гъушуне
Сус гъаре ягъра хьуне
ХIазургIвалар акьуне
Iуьмарас хавар хьуне
Рушан тIагарихъди адине
Зун вун гъасра адесе
Iудар хъай хьин гьишасе
Iуьшакес ягъ акьуна
Халкьдис хавар дахьуна
Чивин маслихIат акьуна
Iуьмар гIвайи сувалди
Руш гъаре ягъра хьуне
Дем далдам хъате хьуне.
Сусан канар аттахъай
Сусан бавар гъафил хьуне.
ТIагарихъди ушуне
— ХIазурди вун ав пуне
ТIагариас аладивуна
ра къай lуьмар ушуне.
Сусан бавар ачайине
Хье Селми андава пуне
Дам далдам сакин хьуне
Сусахъас руцас ушуне
ХIурин гIана имам айи
Гьетил йиркIв алихьайи
Халкь махлукь сакин акьуне
Шав пас имам уч ушуне.
Имамди гIвав акьуне
Iуьмара джувавра ине
Рушас гучIра хьуне
-Гьал хьин варха хьуне
Фигъачугас хьин имамди
Белик амиргвасе хьин задилди
Нагагь дахьуна хьучи
Ишасе Iудар хьин хIуьлиди
Iуьмар адине тевригьди
МакирхIа пуне имамди
ЗурбагIвал гьананф хьучин
Гьетихъай гIвасе Селми
Ачукъуне джегьилар
Алашуне бармакар
Iуьмар зурба хьуне
Селмира хъай ушуне
Iуьмарна Селми
Iудар рекъуъ учIуне
Салим илдешра хъай
Кьавахъас алихьуне
Iуьмарна Селми бахилди айи
Мудурар суман дурхIай айи
ИркIураъ хиял адуй
Кьавахъ душман хъаеф.
Селмис тахърахъар унхьуне
Фиегьан пуна хав алдаркуне
Iуьмарас ерхIа гулла
Селмин йиркIурас киркьуне
Iуьмар Iешай хьуне
ЙиркIурас марти дар хьуне
Канеттил кIил алихьуна
ЙиркIв чирхъуна учра кIине.
ХIуьлмат ае хIурара
Некьв сувалра рукIуне
Iаре кIалив хъирхIуна
Канеттар сакин акьуне.
Исаев Катиб
