Ме дуньяйиъ аядегьен Iайвелна, хатIа – зарар аргвай, ппара четин э халкьдин
сагъвел ухIас. ЛикIи кардиккес ккейчIвас хьасттава, ичира хIаттари, ягIаттари
агъай аве Аллагьдин кьадарилас инсандинфигIилрабицIи дава пуна. Вун дуз
ичира, мункин каре ваал Iаф алчархьуб. ЧIирхIе ният йиркIураъ ая инсан
рекъуьъра кехIей гьучидирхIурай. Инсанара гьер джуребур аве: иджеттар, Iаттар,
сакинттар, нехIекьинттар, дуздинттар, чIиреттар. Ая хъара лишттин инсанар,
чиппин хайир бадалди, пулариъ улар ай, Iайвел аркьа инсандис.
Ме Iайвелин рекъуьъ фера удигь гъатайдава.
Масса ирцIанде нандиъ адава чIирхIе наркотикар, спайсар. Сагелай тIем акьуна
ишламиш акьухаб, ппара Iайи гIачагъа джигьил шиникквар ме агъубури.
Гьер хизандин сахIибари насихIет йина кканде учин шиниккварис, бицIи ами
эхIттият акье пуна, чIирхIе тIул–тIабиIет кедархьас.
Фидегьен гъавурдиъ ихьучира, фидегьен саламатин шиникквра тIулаас адихьасе
са нехIс идетти.
Гьер са инсандис ягIа хизанарин арайиъ фидегьен дардна гъам ихьайчин
наркотикарин Iайвели. Амма фас ичинара ягъ-ягъалас наркоманар ппара вея
агъай дала унихьайдава. Наркоман пуна унихьугуна, дем-бедан фикир ве ме
инсандин ахир иджвелинф дава пуна. ХIекьданра ме кар ширин хьу инсандин аме
Iуьмурдин ният ве нандиас, е дахьучин фиштти джиркIенагьан агъай учис гьер
доза. Ме рекъуьъ фи Iемал кканчира ишламиш аркьа мебури: хьиличIанар аркьа,
хъадикIибар аркьа, элдетмиш аркьа, са чIалалди, рехIетти, дад, бабра кехIей
масса йис хIезурди аве.
Мебур мис ул икIунара аргвайдава учин джандил алдея Iуьрдугьас, психикайин
хIелдигьас.
Джигьиларил ме душман хIевалат хьу арайи, ахир адава пуна сакин хьас вейдава.
Мин Iуьмур бадалди дегIви файшуна кканве. ДегIви гъасра ме душмандин гьер
багварин гъавурдиъ ай кканве. Ке удигьастти ягIар акьуна кканве, фас ме инсан
бахил хьунафчин ме кардил, фи багьана хъайчин: тамашайис, Iуьмурдин
четинвеларихъас, кардик кидавахIела.
Ме агъу ппара макурзана э. Садпегелай тIем акьугуна, инсандин хиял ве кIилди
дунья учин гъилиъ ая пуна. Амма михъди вардиш вередегьен, миштти
амилгвандава, вей-вей кьадар ппара акьуна кканве.
Ме итталин садпе стадия идегуна, наркотик джандикес кеттархьугъилди
психическая зависимость ве, мин хIел чIирхIи аве.
Iудпе стадия э физическая зависимость. Мегуна наркотик кеттархьугъилди
инсандин джан ругIуна ахъуф суман ве. Гьер джурейин Iуьрар гъамаз ве джандил.
Гьемихъас цIае доза джикIиб Iуьмурдин лазимвел ве.
Хьибудпе стадиъ наркотикдин дозабур чIукь ве, амма ме кьабул акьубалас асуллу
ве инсандин джандин, маскъварин лихуб.
Ме хъудавай инсандивас экьвас вейдава.
Наркотикарихъай барамбар э ухубан кара, дивубан кара.
Кара фадихьа, хурубра, хизанарин арабура сарин аркьа, сагъламвелра фадихьа,
дава курара ппара ве, чиппи чаб кIибара кехIей мункин каре.
Гьеме ахттилатар ке Iайи рукьас акьуна кканде дадар-бабари чиппин бицIиди
кегъархьу суман шиниккварихъди. Фас пучин, ме яшдиъ аягуна э Iемал кидава
джигьилар Iайи гьинахъ хьучинра хъучавереф.
Хье мактабариъра кехIей аве нехIс инсанар, ме къайфат э, ме фичинара э агъай
наши шиниккварис нанди адава задар кичихьаттар.
Ул фатуна, фикир фачат пуна кканде бицIиттарис мишттин курарис.
Ягъ-ягъалас алтухъ ве наркотикарин цIае джуребура. Мебур машгьур аркьа
халкьдин арайиъ са хатIа-зарар кидаваттар суман. Iайвел йиркIураъ ай, пул ккане
инсанари зайдайи гIачадивас алучIа пул хъая хизанарин шиникквар. Чиппин хайир
бадалди мишттин инсанарис фушра, фера Iегвал дава.
Инсандин Iуьмур ппара багьа э. Джалла халкь сад хьучин, джемеIетивас хьасе ме
кардил гъалибвел гъушуна, сагъвелра ухIас.
Батитай Габибулаева
