Авала cуман ппара ккикIай андава хьурар, зас ахъакьас кканде фиштти хьуракк вереф ичин гехъуьнарин хумбар. Гехъуьнарин хIуриъ аяфи агъа йицIу хьар. Хьуран эессис агъафи хьурахъан.

Амма хьуракк вестти, инсанди учин загьматилди узуна кьур, уцуна сумар алайхIафи, дагил алийина гъарефи кьур ругIас рагIухъди. Агьал хIезур гIур хулаъди рукьуна гъай аве. Найи аркьайчира кьутIур, Iуьфер, пай аркьафи. 5-7 хумбеф гъузуна авейи чиппин нубатихъ, аркьай зарафатарна элхъуьбар хъара мегIнибура.

Нагагь хьураккес верегуна гимил экьуна инсанар айчин, гебурисра фачиянфи са кьутIур, гьудуркIайчин, ма вас са ибгIа гунира агъафи.

Са кIватт сулен гуниварин аркьафи. Са кIватт гуниварин утунихъ хъаверефи, са къайда гъилив, гисагI Iуьферара хъара кьутIурара. Калтуфар кеттивай алчархьухаб, фачиянфи са хириъ ая калтуфар, ма чвас руьхь пуна. Нагагь алчархьичин йибурар аркьагуна хъара кьур гьагъирхIагуна, ма IарчIе-кьур акье пуна фачиянфи.

Гъазеттар фай вей алчархьухаба, ма чвас са нубатис чакьаъ–Iуьферар акье пуна фачиянфи. Мал руккуна алчархьухаб, са килав яккун пуна фачиянди. Джакьваяр IуьтIанас верефи Сарадиь агъа усаъди кьелна кум фай. Бабарихъай шиникквара. Сарадиъ агъафи Къабанан ХIаджимурадан агьал хулар ая усас, Тамирарин Мусайин хулар але мукьуйис.

Авал заманайи инсанари раккагь курар ппара аркьафи, кунар, къабар Iуьрччанчинара, нецIухъди верефи, хьуракк, раттихъ, рагIухъди хъара IуькIерис.

Хумбари ийина чиппин IуькIерин дучара Къунарин IэчIа агъа зурандихъ, экьуна аркьафи мегIнибур, рухай гвегIенра. ДжемеIет са Iайи бахилди йиркIв алийина эркьвафи агъа унихьа мегIнибурил.

Шибери ханавур (цинкIиликIеяр) агъа дурахIелар аркьафи, кIиркIари кIутар шиланфи, идемари рес-гиштта аркьафи.

Фидегьен загьмат кей лиханчира, касибди дуламиш вейчинара, инсанарин арайиъ нуьхIуьбат-хIуьлмат авейи агъа.

Жавгарат Хамазаева