Гьер инсандис учи аркьая кар кьабулди ай кканде гIешкъунилди кар акьас. Миштти идегуна, кьабулди аркьая карди иджвел аркьа учис суман, хъара багварихъ хъаяттарисра.
Гьер са кардинра ая учин четинвел, лазимвел, хъара джувабдарвел. Са-са мукьариъ саиштти йиркIуран мерттвел, йиркIуран сабур фай, хъара имандин цIуппевел фай акьуна кканде курар ая. Сад мишттин пеша э имамвел. Ме пеша гIативуна, кьастт фай кар аркьаф са-са инсанари э. Фас пучин, ппара джувабдарвел хъая кар э.
Имамвелдин пеша акьас ая лазим иде хурубар, гIилмибур.
Имам агъа чIалун тарджума э инсан идже рекъуьъ ихьуб. Гьелбетта гьемишттин кар кIили гъас инсан уч хьуна кканди ая имандин цIуппевел, йиркIуран сабур фаяф, хъара гIилмин хурубар кеяф. Гьемишттин кар акьас алчархьуне учин разивел фай Мусаев МухIаммад Амаевичас
Мусаев МухIаммад(Салвар) Амаевич хуне 20-пе сентябрьди 1995-пе исан Агъул райондин Буршагъарин хIуриъ, ппараIди хIа дава хизандигI. 9-пе классин хурубар ккиркIухаб, 2010-пе иса учIуне хурас Дагестанский Исламский Университетиъ ислам диндин гIилмибур хурас. Гьеме мукьуйиъ хурая вахттуни, ми хъара хуруне са мукьуйиъ сара- Гуманитарно-педагогический колледжи(ГПК) агъавусаъ.Хурубар ккиркIуфна сад, хьуне ме кардик мегIелимвелди гьеме Исламский университетиъ. Хабди МухIаммад Амаевича кар акьуне ЧIаарин хIуриъ мазгитан имамвелди.Гьемисаъ кар акьуне хьибу исна сура, инсанарин разивелди, баркаллагьдин чIалра хъай. Ме мукьуйиас ме гьикуне кар акьас Дербент шагьурдиъ са мазгитаъ имамдин наибвелди.Са исна сура ме мукьуйиъра кар акьуна, гьеме исан майдин вазала гьикуне кар акьас Махачкала шагьурдиъ ке хIа мазгитан имамдин наибвелди.Са вахттра алттудушуна, кьанди, июль вазалан 21-пе ягъа МухIаммад Амаевич хьуне Республикайин ке хIа мазгитан имам.
Мубарак акьуна МухIаммадас учин цIае кар, чин акьуне са бицIи ахттилат мин кардихъас.
«Исламдин гIилмин хурубар зун гIаттивуф зе гIешкъ хьуна э. Махьтабиъ хурая вахттари, дарсар ккиркIухаб зун верефи хIурин имамарилди Багаудин хIеджилдина, хъара Сайфудин хIеджилди гIилмибур ягIар акьас. Зас ппара хIа чугъсагъул пас кканде мебурис Iударис зун ме кардин гъавурдиъ ихьубан. Гьелбетта даданра бабан насихIетара гIая зун ме рекъуьъ ушубагI. Ме рекъ зун гIаттивуне пуна зе пушмалвел адава.Зун хIисаб аркьа, гьер са мусульман инсандис ягIай кканде учин диндин шартIар, гIедатар. Гьеме курар кидавай, хьуна кканди ая дуз рекъуьъ ихьа инсанра. Имамдин вазифа э мусульман инсан дуз рекъуьъ ихьуб. Зун фикир аркьа, гьер са инсандин ая кьаст, гIешкъ ягIархьас учин диндин шартIар. Ппара чугъсагъул пас кканде зас кумак акьуна, майил акьугьенттарис»,-пуне МухIамад Амаевича
ЯгIайин ягъас МухIаммад Амаевичахъ хъая хизанра, са рушра. НасихIетар йисе хьин МухIамад Амаевичас, гьалдин хабра хIа агвалкьунар хьурай михъ пуна.
Наибет Гасукаева
