Ул ачатугуна, инсандин Iуьмурдин рекъ ппара джикъи э. Гьеме джикъе Iуьмур инсанари фарта герек идефра давафра курарис. Укъубарис, гIахъубарис, дегIвибурис. Гьер са вахтт гIартай дуньяйив фаве учин дегIви. Гьемиштти са агъзурна ерчIу вершна муйцIурпе исарин несиларис ппара батIарди кIвалди ахьасе Афганистандин дегIви. Фиштти э пучин, хье Советский Союзди ацIуна исари кумак акьуне мебурис душманарихъайна талибарихъай дженг дивас.
Афганистан хIуькуматин кIилиъ ая вакилари тIалаб акьуне СССРдивас чиппис кумак акьуб.
Мебурин тIалабламайилди са агъзурна ерчIу вершна ерцIурна ерчIудпе исан къана гIуьфудпе декабрьди хье хIуькумати Афганистандис кумак гьикуне.
Са агъзурна ерчIу вершна муйцIурна ерчIудпе исан цIегIуьфудпе февральди аттфайдине хье аскерар мидас.
Ме йицIу исан арайиъ Ватандин удигь чиппин хIа бурдж йис ушуне Афганистандиди ерхьи вершна къа агъзур инсан. ЯгIайин ягъас ме игитарна ветеранар кIвалди аме хье хIуькуматин джемеIетинра РФдин правительствойиъ кар аркьая вакиларинра. Мебур кIвал ухIубан рекъуьъ кар аркъая хье вакилари. Гьергелай Афганистандиас хье аскерар аттиву ягъа, ис исал адидегьен, аркьа гьер джурейин мегIракабур ме игитарис бахш акьуна.
Ттиъ магьа хьибцIурна якьу ис э ме ягъан. Российин гьер са шагьурдиъ, гьер са райондиъ, хIуриъ, са чIалалди, гьер са мурттаниъ кIвал аркьа ме кар. Хубджи ая хизанар, ме дегIвин дардна къакъ йиркIвариъ меркIвар суман укъуна аметтар. Фас пучин, мебурин хулариас Iешкъ але джигьиларин Iуьмурар файшуне.
ЦIегIуьфудпе февраль, ме гьакIанди исан са ягъ дава. Ме хье джемеIетин йиркIвар чиппин играми валадар, багу – кIилин джигьилар чиппин хулариди аде ягъ э, шадвелдихъай барамбарди гьелбетта джигьил Iуьмурар гулу хизанарис ме лап хIа дардунинра ярсдин ягъра э.
Ме дегIвиди файшуттарин сан суман, кIиттарин санра хьес ягIа. ЦIеякьу агъзурна якьу вершна гIуьфцIурна хьибу джигьил аскерари чиппин Iуьмурар йине мисаъ.
ЙирхIунар, аргIубар, контузия хьуттар хьуне гIуьфцIурна хьибу агъзур аскерарна офицерар.
Мич ачафайшу аскерарикес ппара хьуне кIиттара, есирдиъ архьуттара.Ппара четин, варха рекъ хьуне ме аскерарис ме йицIу ис. Амма шукур хьурай, сагъ саламатилди чиппин хуларихъди, дадар бабарин хилариккди рукьуттара хубджи хьуне. Мебурира кIилди джемеIетихъай къаршиламиш аркьа гьер иса хьес хIаягъ хьу цIегIуьфудпе февральдин ягъ. Мусра кIвалас давере ягъ э Афганистандин дегIвин ишттаракчибурис ме ягъ. Джалла Советский Союздин ватанагьли аскерарихъай къирах хьундава хье Агъул райондин джигьилара. Ппара векIехIвелилди дженг дивуне мебури Афганистандиъ душманарихъай. Мебур э: Рамазанов Гасан Маллаевич, Рамазанов Азим Абаевич, Абдуллаев Замир Магомедович, Каидов Булай Раджабович, Махмудов Пирмагомед Юнусович, Гасанов Рамазан Амаевич, Гусейнов Гусейни Касумович, хъара джуреттара.
Мебури лап зурбадалди йине чиппин интернациональный бурдж. Хъая мебурихъ игитвелдихъас йина джавизара- медаларна орденар.
Гьелбетта хьуне кIиттара. Мебурикес сад э Гашимов Джалалудин Абдуллаевич. Джалалудин Абдуллаевич са агъзурна ерчIу вершна гIуьфцIурна ерчIудпе исан цIемуядпе октябрьди Гъудгъуларин хIуриъ Гашимоварин хизандиъ хуне. Хабди, самуз кегъархьу вахттуни, кар акьуне Агъул райондин Типпигъарин совхоздиъ. Са агъзурна ерчIу вершна муйцIурпе иса файшуне армиди. Аттархьуне ме Афганистандиди. Ппара ишттарак акьуне ми ацIуна боевой операцибуригI. Гьеме исан цIеерхьидпе июльди Асадабад агъа шагьурдин къирагъихъ ме алчархьуне чиппилди гьужум акьас ккекьуна душманарин аскерарил. ХIеракат акьуна цIа угъуна, мебури душманар тарг акьуне. Гьеме гьужумдигI гуллабур киркьуна йирхIунар хьуне. Ме йирхIунариккес къутармиш хьундава Джалалудин. КIихаб йине мис медаль «За отвагу».
Мин игитвелдин ттур йиная чиппин Гъудгъуларин хIурин учира хуруна ккиркIу махьтабис. Магьа ацIуна исар э ме махьтабиъ хурая шиникквари, кар аркьая мегIелимари хIейиф хъай кIвал аркьа чиппин Игит иде аскер, Джалалудин Гашимов. Нае ученикдивас хабар гъушучира, мебурис ягIай ахьасе Гашимован агалкьунар. Гьер са Гъудгъул шува дамакъ аркьа ягIа чиппин хIурин Игитилди.
ЯгIара ме ягъас бахш акьуна арайил акьуне райондин дом культурайиъ мегIрака. Мишттин мегIракабур аркьай аве завал акьуна ветеранара гьер иса. Мусра хум гьартайдава хье кьехIеларин зурбавелар. МегIракайил ишттарак акьуне хье райондин хIагьуларира.
Мебурис мубаракар акьуна, гъургъуне райондин хIаф Закир Гусейнович, прокурор Светлана Вагифовна.
Хъара аркьай аве спортивный мегIракабур Афгандин игитарин ттуранихъди. ЦIеякьудпе февральди мишттин спортивный мегIрака дзюдойиас хьуне Махачкала шагьурдиъ. Мисаъ хьибудпе мукь фацуне Агъул райондин Типпигъарин хIурин Байрамов Мурада. Хъара ппара хьурай хьехъ мишттин зурбабура.
Игитар хье гьер са райондиъ, гьер са хIуриъра ая. Мебур хъай иджи э, амма ме кьиматилди гъушу игитвел ккандава. Дуньяйиъ ислехIвел хьурай! Хье джигьиларис, алгъархьая несиларис дегIвибур дагурай. Джанарин сагъвелар, ирхе Iуьмурар, ачухъ йиркIвар чиппихъас кам дакьурай.
Салихат Малагусейнова
