Дагъусттан мус хьучира Игитарин макан э. Хье идемарин йиркIвар сувар суман гьава э, хIуьлдан суман цIуьппи э. Ме кар хьес аргва республикайин ацIуна асирарин тарихдихъ хъуттурфугуна. Миштти пугуна, гьелбетта ме агъа чIал дава са хьехъ дала игитар хъадава пуна. Гьер са миллатихъ, хIуькуматихъ, шагьурдихъ, хIурихъ хъая кьацIра кIвалас гьадартай, джигьиларис чишна суман асирариас асирариди, исаас исади гъаре чиппин игитар, гебури акьу зурба гьунарар.
Мебурихъас лиркIенде газитарик, китабарик, журналарик, агвар аркьа телевизордиас, ахъаркьа хIаттари бицIиттарис, мегIелимари шиниккварис. Са чIалалди, гьертти учивас вере кумакилди афухIа мебурихъас фикир.
Гьаме фикир хъара Iайи цIуппе акьуб бадалди «Единая Россия» партин икьрарилди арайил акьуне гIилмин проект «Игитин парта» агъаф. Ме кар арайил акьуна хьибу ис вея. Къараз э мин хье махьтабариъ хурай ая алгъархьа джигьиларин ватанперасвел алтухъ акьуб, мебурис гьерттис уч яшамиш вея, учин ватандин Игитарин сурат ягIархьуб.
Ахиран хьибу исан арайиъ Дагъусттандин ери верш махьтабиъ Игитарин партабур арайил хьуная. Ме кардихъас хабар акьуне региондин наукайинра образованин министерствойин пресс-службайи ТАССдис.
«Ме проект арайил акьухаб, са агъзурна са вершна ягъцIурна муяд дахъуна ая мишттин партабур. ПроектигI гIачучIуная ери верш махьтаб. ХIа пай ме партабур дахъуф (са агъзурна вершна къад) ме иса э», — агъа ме хабариъ.
«Ме партабурик кея Дадарин ХIа дегIвинра Российин Федерацин Игитарин ишкилар. Чишнавелди гьучихьуна хъуттурфучин, Кизлярдин №2 лицейдиъ дахъу партабурик ме махьтаб ккиркIу Советский Союздин Игит Петр Крутованра Российин Игит, полицин лейтенант Магомед Нурбагандован ишкилар кея.
«Ме акция давам хьасе республикайин махьтабариъ. Игитин парта ахьасе гьер са классиъ», — хъара хъучихьуне ведомствойи.
«Игитин парта» — «Единая Россия» партин ватанперасвелдин проект э. Iу агъзурна цIеерчIудпе исахъас мич э ме проект арайил акьуна кар аркьай. Гьер са мишттин партайик лиркIенде тарихар хье Дадарин ХIа дегIвин ветеранарин, гьер мукьариъ хьу дегIвибурин ишттаракчибурин, загьматин ветеранарин. ЯгIайин ягъанис мишттин партабур арайил акьуная Российин гьер регионарин шагьурариъ. МебуригI гIая Северный Кавказ, Московский, Ростовский, Мурманский вилаятар
Гьемишттин иджвелин кар рукьуная хье Агъул райондидира. Агъул райондин Гъудгъуларин махьтабиъра акьуная Игитин парта. Ме парта адихьунаяф Российин Игит, полковник Каидов Зулкаид Гусейновичан ттуранихъди э. Ппартайил алдея мин ишкил, мис йидегьен джавизар, Iуьмурдин тарих.
Шиниккварин арайиъра зайдайи фикир ая ме кардихъас.
Ме махьтабиъ ерхьидпе классиъ хурая ученица Генджаева Залинайин чIаларилдира, ппара идже кар э ме акьуф. «Ме парта акьухаб зас ппара ягIархьуне хье райондиас иде Российин Геройдин Iуьмурдихъас. Зе фикирдилди, ватанагьлибурис ягIай кканде чиппин Игитар», — пуне Залинайи.
Ме махьтабиъ кар аркьа мегIелимарира са сесунилди джуваб ирцIанде: «Хье шиниккварин йиркIвариъ ватанперасвел икIас ппара идже кар э ме. Чес аргвая, вахтт хьугъилди шиникквар фиштти ме партайихъди гьуккайчин. Шиниккварис ягIай кканде, чиппин гIуьмур, джандин сагъламвел гIегвал дакьуна, дженг дивуна чиппихъди ислехIвелдин нур рукьас акьу кьехIелар. Мишттин фикирар ппара хъая хье ватандихъ. Мебурикес сад э хье пайдагъигI гIая ире ранг. Ме ранг Ватан бадалди чиппин джанар йи Аскерарин иъ хIисаб э. Чес пас кканди ая, фи багьана аркьайра, фиштти ахъаркьайра мусра кIвалас вес атуна ккандава хье Игитар».
Зулкаид Гусейнович хье республикайиъ Конституцин строй ухIубанра терроризмдихъай укъа рекъуьъ дженг дивубан Федеральный Управленин хIаттин заместитель э. Хуне ме са агъзурна ерчIу вершна ерхьцIурна муядпе исан къана ерчIудпе январьди, Агъул райондин Буршагъарин хIуриъ, Каидоварин хизандиъ. Махьтаб хIуриъ ккиркIуне.
Са агъзурна ерчIу вершна ерчIцIурна ерхьидпе исалас Iу агъзурна цIехьибудпе исалдидегьен РФдин ФСБйиъ кар акьуне, идарайин хIаттин заместитель хьуне. Хабди ме файшуне Москвайиди, ФСБйин центральный аппаратиди.
Ппара ишттарак акьуне контртеррористический операцибуригI Северный Кавказдиъ. Ме кардин рекъуьъ хубджи йиная мис орденар, медалар. Эктремистарихъайра террористарихъай укъубарин ветеранр э Зулкаид Каидов.
Ватандин удигь бурдж ирцIан рекъуьъ ми агвар акьу идемивелна игитвелдихъас Российин Президентин Указилди Iу агъзурна ерчIудпе исан къана якьудпе мартти Каидовас Российин Игит пуна ттур йине, «Золотая Звезда» медальра хъай. ЯгIайин ягъара ме ая кар аркьай, яшамиш вей Москвайиъ.
Гьелбетта ме Игитарин партабур дархъа кар шиниккварин тербияйис муфиIетлу, хайирлу кар э.
Фидегьен вахттар алттушучира, заманабур духIуба хьучира, кIвалас гьатуна ккандава хье ватанагьли Игитар. Гьер са дадан, бабан, багу – кIиларин лап хIа вазифа э, чипппин алгъархьа несиларихъди ме ягIарвел рукьас акьуб.
Вахттар ккеттвесе, инсанар духIуба хьасе, амма ме Игитар дуньяйил алгъузу чавушар суман йиркIвариъ амилгванасе!
Салихат Малагусейнова
