Авалан машинар адава заманабури инсанарис ппара читин и акьу IуькI, кIур, кеттиву калтуфар хулахъди гъас. Ме кардис кумаквелдис кIвал акьуне Iераба.
Iераба аркьайи ирхе кIурарикес. Курарис мил акьуна верефи идемар дараъди. Файде кIурар Iашуна ами аларкьайи, рукъухаба алакьас даверехIела. Лазимди ая кьайда кIурар хIезурхьегуна джаллабури кумак акьуна завал аркьафи Iераба.
Iерабайихъди кканвейи вецара, ккитIуна ишламиш акьас. Те вахттари са хулаъ Iу вец хъаттар ппара авейи. Са вец хъаяттари чиппин арайиъ маслехIет акьуна фитIуна аркьай авейи курар. КьацIра хъудаватти ушуна колхозди тIалаб аркьайи са джут вецарин. Мил акьуна садихъди ппара гъас кканеттари нан агъайи Iу джут вецарин.
Iерабабур авейи цулинфра хьидинфра. Цулин Iерабайилди гъарефи IуькIер, сумар, кIурар. Хьидинф ишламиш аркьайи алийина замурхIра хуппурариъ фурдар ахъас, хулагъарил алахъас ругар гъас, гъванар ахъуна гъайи хулар, джигагьар акьас.
ЗамурхI аркьафи дараас файдина ая икке тIуларикес. Усттайи замурхI ругъас хъучучIайи кIенахъас, хабди бицIи-бицIи алгъадивайи багвар. Гьеме замурхIар аркьа усттабури аркьафи хъара фурдагъар, фурдакIар. Ме кардин идже усттабур хIисаб аркьафи ЧIинкIарин ХIесан, Iуьшттарин Iешура, БицIибагьаларин Ибригьим хъара сасрабура.
Iерабайил алийина IуькIер гъарегуна кканвейи фурилас дива кьачIинра-муфур.
КьачIин аркьафи цIуппе кIураникес. Михъ хъиртIан муфур аркьафи кIаре малдин леъдикес. Алдахъу леъ сагелай тIишина гIудул аркьафи, хуппай икIафи кIаре нафттиъ. Хабди икке чIилар аркьай аларуцай артIайи. ХъитIуна са усахъ хъучучIайи цIуппе куч аркьай ругъас. Ме ругъухаба са Iу ягъари кейхьафи минарайин кIукIукес ахтт хъитIуна са хIа гъван, я Iерабайин фур. Мебрихъди герек вейи байирдин курарис кутал, урккагъ, дуруц, зигзигай.
Гьал Iерабабур ишламиш аркьай андава. Хъаметтари сури музейярис йиная, са ппараттаринттар фадихьас Iегвалди цаларикес кегъирхIуна атуная.
Луиза Гусукаева
