Мухlаммад пайгъамбардин с.гl.в.с. хlадисиъ агъай ая, мегlна: «Са ягъарикес са ягъа пайгъамбардис алихьуна ая суал:

-Я, пайгъамбар, мункинев диндиъ ая инсан гучlрахl хьуб?

— Мункине, — пуна ая ги. — Гучlрахl э пуна, гин дин загlиф вейдава.

Сасра суал алихьа пайгъамбардис:

— Я, пайгъамбар, мункинев диндиъ аяф гашинф хьуб?

— Мункине, — агъа пайгъамбарди.

Хаб сасра суал алихьа:

— Мункинев диндиъ аяф lемалар аркьаф хьуб?

— Ваъ,  — агъа пайгъамбарди.

Хуппай хура пайгъамбарди Аллагьдин калям, мегlна: «lемалар аркьаф Аллагьдин ишаратарихъ хъудугъаттари э».

Мухlаммад пайгъамбарди с.гl.в.с. lемалар мунафикьарин курарикес э агъа. Пайгъамбарди хьибу карди мунафикь ягlар аркьа пуна ая: «Садпеф, ги фиттихъас ичинра ахъаркьагуна, lемалар аркьа».

Учин илдешарихъай, шиниккварихъай, хизанарихъай гъургъагуна, lемалар аркьай гъургъа. Гин мезуралас lемалдин чlал алттвей аяф. Мухlаммада с.гl.в.с. варха ухь пуна ая диндиъ аяттарис lемалар акьубагьас. Дузвелдигьас, дугъривелдигьас варха даверегъилди. Зарафатаригlра гlачихьай ккандава lемалдин чlалар.

Мухlаммад пайгъамбардин с.гl.в.с. хlадисиъ ахъаркьая: «Пайгъамбар хулаъ уйи ягъа унихьа гис Гlабдуллагь ибн Гlамиран баба ун архъай шиникквдис мич шаб, чин вас фи ичинра йисе агъай. Пайгъамбарди алдаркуна гин джилихъди агъа Гис:

— Вас хlекьди фи ичинара йис кканди аяв ле шиникквдис ваалди гьучадигуна, е ваалди гьучаадирай пуна эв лиштти агъай аяф?

— Зас гис финикар йис кканди ая, пайгъамбар, — агъа дишагьли.

— Вун ле кар дакьуна уйихаба, вахъди ликlина ахьаси lемалар».

Аллагьди lемалар аркьаф шайтlанари э пуна ая. Хъара кьурандиъ пуна ая, мегlна: «Шайтlан багу ве гьер lемаларна, гунагьар аркьаттихъди». Аллагьди агъа дузвел дуьйиъра, ахираттиъра кумак хьасе пуна. Аллагьди кьурандиъ пуна ая, мегlна: «Аллагьдихъ хъугъуттар, гучl ухь Аллагьдигьас, дуздин чlал агъаттарихъай экьве».

lемалинра учин дараджабур ая. Ке хlа lемал Аллагьдихъасра пайгъамбардихъас с.гl.в.с. Дагlай тиштти э, миштти э магъа агъа пайгъамбарди Аллагьдихъасра, учихъасра.

Хьес аргвай аве дадар-бабарис шиникквари фи ичинара гъуян, е вун зас фи ичинара гъасев пугуна, хьурай агъа, учи lемалар аркьай, ниятракегьей адавай гебури пеф акьас. Хье шиникквари хьесра аркьа lемалар. Гегуна фикьас акьуфе, lемалар маркьа агъа хьин гебурис, амма хъагъуланди аяф шиникквари ге табиlатар хьехъас э.

Ппара lемалар аркьа инсанари сасрайихъ девлет хъай агугуна. «Зунра мишттинф и, багьа машинар захъра хъуйи», «чвас ягlав ти девлет фишттин чlирхlе курар акьуна къалзалмиш акьуф ичина» хъара гебурис ухшар иде гафарар агъай. Хизанарин, илдешарин арабуриъ ихьай lемалар аркьаттар ая. Инсанар сад сайихъай дуз акьас ахттигьар ая lемалар акьас сасрагъилди фишттира давей аяхаба. Ахттигьар ая lемалар акьас хизандис, ге шад аркьай гьава гъадивас, арайиъ адархьас. Дегlвиъра ахттигьар ая lемалар акьас. Фи пас хьасе инсанар гlахъас аркьа lемаларихъас? Гебурин ппара хlа гунагь ая.

Чlирхlе lемаларикес хlисаб аркьа lемалар эмкlерихъас, дагуттар агуне агъай. Гишттин инсандис ахир кьияматин ягъа Аллагьди джархун lу ударил итlул алихь пасе агъа. Тегуна дахьу кардихъас lемалар акьуна ахъакьуне пуна, агьал вун аркьай ая акьас давере кар, пасе агъа Аллагьди.

Мезура lайвелра гъа, иджвелра гъа. Гиштти идегуна ухlуна кканде сив lемаларигьасра, хъаттхурубаригьасра варха хьуна.

Камиль Мирзоев