Iеларин Раджаб Шамсудинован тухумдихъас

Раджаб Шамсудинов э Типпигъарин хIуриъ дуламиш вей уйи Iеларин Шамсудинанра Iешин шиниккв. Шамсудин Рамазанович хуне 1915 иса. АцIун гашар, мекIер агу идеми и ге. Ги курар акьуфе колхоздиъ, председательра колхоздин хьуфе гикес.

ДегIви хъучучIугуна 1941 иса файшуная гера гин бицIи чу Ахмед дегIвиъди. Гегуна гихъ хъай уйи Iу шиниккв: са рушна са кIиркI. Дад дегIвиъди верегуна ге кIиркIан, Раджабан, и 9 ис. Ге ухIуна хIа акьуная учин хIадада Рамазан Шамсудинова. Баб гегуна гебурихъай андавуйи, дада некехI алайхьуна уйи лап дахи. Баб ушуна уйи сасра шувас, Кьулачарин Гусейнис. Бабара учифас вере кумак аркьайи гис.

1943 иса адине кIедж гин дад кIине агъаф дегIвиъ. Сасра кIеджра адине, адад нандиъ айчира дагIай гулуне агъаф. ЯрчIудпе классиъди агъархьухаб, багунттари кумак акьуна, джикIиная гис кар, Iуьшан къаравулвелди банкунин. Раджаб Iуьшуй къаравулдиъ вей ахьуная, багами мактабиъди. Гиштти учин дуламиш аркьай ахьуная ги. Мактаб ккиркIухаб файшуная ге армиъди. Армиъ ге хьуная хьибу иса. Армиас адихаб Раджаб ушуная хурас Iуьрусаттихъди высший милицейский мактабиъ. Ге ус ккиркIухаб кар аркьай хьуная Кизлярдиъ адвокатвелди милицайиъ. Гидас айчIугуна, ги ликIенас хъучикуная гIерза сара милицайиъ кар аркьас вей адава агъаф.

Хабди адиная ге хIуриъди. ХIуриъ ги кар акуная ке удигьай редакциъ. Хабди гикес хьуная комбинатин директор. Гисаъра ппара гагьди кар аркьай хьуна адава гин. Хъара ппара усариъ курар акьуная ги. Ахирахъди ушуная ге кар акьас райпойиъди. Райпойиъ ги ппара мукьариъ кар акьуная: бухгалтервелди, гьерджуре дикванариъ, завскладвелди хъара джуре курарилра.

Учин адада, Iеларин Баджай агъатти, джикIиная гис хьир, Мержанат агъаф. Мержанат э са ашкIин хьиран руш. Гин баб э Наварин Байранкъиз, ккейчIун курагъарин шуваккес адина аяфи хIуриъди, хъай са рушна са кIиркI.

Мержаната ахъарка фиштти чаб адиф ичин Курагъаас: «ХIуриъди вея са IерабайигI гIучIуна вей уйи чин: зунра, чура, бабра. Са пеIра фай уйи чав. Са арайилас алдутIуна Iераба, адахъуне чин джалла гиас. Фаттархьуна гьишина ушуне чав фая гьеге са пеIра. Адигуна нач вейчира ягIай адавуйи час. Са къурчар хIиллайилди кегъдивуна экьуне чин гисаъ. Че адад, бабан чу, тегуна и хIурин кавха. Йине ги час мукь хал акьас. Бабра зун ушуне гъванар завал акьас, хал акьас. Чу бицIиф и. Хъахъуна файдине чин са-са гъван. Фадихьуна гьаге гъванара экьуна Iешуне чин. Мус час гьал хал вереф пуна. Ппара загьматара дивуна, гьерттарис минатар, хатир аркьай, акьуне чин час хал».

Раджабана Мержаната хуна, ухIуна, хIа акьуная гIуьфу шиниккв: са рушна якьу кIиркI.

Ке хIа кIиркI Шамсудин хуная 1 январьдиъ 1960 иса, Ахмед хуная 16 мартиъ 1964 иса, Рамазан хуная 14 ноябрьдиъ 1965 иса, Гаджирамазан хуная 24 декабрьдиъ 1968 иса, Ашай хуная 14 сентябрьдиъ 1969 иса.

Iеларинттар Типпигъарин хIуриъ аяф са чIукь милат э, ама ппара нуьхIуьбат, хIюлмат аяттар э сад сайихъди. ЦIакIинилди, гамачIилди алчавей алттвереттар э. Сад сайин гьавабур гъадиваттар э.

Джандиъ сагъвел хьурай чве, йиркIурас рехIетвел хьурай. Чвас чве шиниккварикес Iеквар агурай.

Нафият Шамсудинова

Свежий номер