Ахьуне  агъа са хIуьппехъен идеми. ДжемеIетин  хIуппарихъ вей, учин кIил ухIаф. Са ягъарикес са ягъа  мучI фадаркехаб, ачикай хьуная ми мехьиъ хIуппар, гьеге хIуппаригIай, даргвагъилди, агъдаркуна  ккулара хъацуна ачушуная мехьиди къачагъар. Ачикуна сакин хьехаб, учIуная ме учин кумайиъ. Са арайилас  хабар хьуная мисс  мехьин ракк гьадихьай. Фуш ичугас адеф учин чарава гъас, айчIуная ме Iэквра фай. ХъатрикIерис агуная хIуьппехъен  айчIуф, чиппин суратара агуф. Алийиная мебири хIуьппехъендил туфанг.

Ппара  миннат э чвас, зун малюкI  сара,- пуная ми!- зун чвас Аллагьдилди хIу аркьая са ел але  тIутIусра  кехIей зун чвахъас пасттава.

Ги хIу аркьагуна, гин варттал хъултугъикк ккея сунна агуная хъатрикIерис. Ге идеми пуная учин са макьамра ирхIуна, есе пуна. Ге идемис ягъай хъуная, учи макьам йирхIучин, учихъди хьир аттвереф. Амма хьир кетIуна адава. Хьир девей агуф, гьайшуная ме са муз хIурихъди, атай суннара (макъам къатт дакьуна) мин макьам унихьуф, адахъуная сайихъ сад чуданар. Макьам атай улар-муулар аркьай агвар акьас алучIай хьуна ми гебирис къачагъар аяф тисаъ. Чуданар гъавурди адархьай

хьуная, фас  гьеми куме тIулар аркьай, агъай. Хуппай гьучушуная ме хIуьппехъен гъвандигьди. Хуппай пуная ги:

«Я джан гъван, гъван, гъван  хьурай  сара вакес. Гьетисаъ хIуппар хъадиркIендея. Зафас пас вей адава инсанарис.  Зун Аллагьдилди хIу акьуная, са тIуруш тIутIусра пасттава пуна.»

Унихьуная  ги агъаттар инсанарис. Гьукка ушуная мегьигъди чиппин хIуппар фаттивас. Фаттивуна чиппин хIуппара, тIапI акьуная мебири къачагъарис, чиппин багвулихъди сара лек идихьагъилди. Са хилла — чарайис дакIина ккеттархьуная къачагъар. Сара вархаласра кей аргва вусагьди гьучавей хьуна дава  тебур, гъвандихъай гъургъа хIуьппехъендигьди.