Исан гьер вахттунихъ учин итталар хъая. Гьаме Iайи вирус гъамаз хьуная вегIдайи зас ахъакьас кканди ая IамIалаяр (мать-и-мачеха) агъа IуькIерихъас.

Фас пучин мин цIабари ппара кумак аркьа мишттин итталарис.

IуькI уч фишттинф э пучин, Iеламатинф э. Ке удигьай агъучIа мин тукар хъуьхъи адахъуна, гьете хьидин сифтта кIилиъ димари, хабди тук алахъугуна ве гъилин гапар суман хIа цIабар варттал багв шергве гъазеттар, кIенакк багв джагвар суман чIичI алеттар. Сагъламвелдис дарман кея мин тукарик, цIабарик, тумарик, мерIерикра кехьей.

Ме IуькIуьгI гIая эфирный ччамари кумак аркьа воспаленибур хьугуна, вирусар, грибокар, микробар кIес. Сагъ аркьа йирхIунар: сивар агъархьугуна, кьуркьарин, къарфунин, рударин, — са чIалалди, инсандин гIана-багварил алдея йирхIунар, чIукь аркьа гебурин тIагIувел.

ЦIуппе аркьа инсандин джан, иммунитет, дуз аркьа холестерин, гIудул аркьа бронхит, кумак аркьа мухур хъаягуна гIургIур алагъихьас, IуьтIуф хIел акьас. Ппара кумак ве балхун икуная мукьарис, къайдайиди гъа табар, гъурзар аркьа адавея иъ.

Ахъуна са къабуъ цIабар кканчин рукъуттар, канчин Iашуттар алгьатуна руьхьея хьед вахтт гIартай ухугуна, батIарди кумак аркьа ме са хьибу-якьу ягъан арайи фидегьен Iа мухурисра, пневмония хьеттисра.

Хъара ме IуькIуьк кея гьер джуре витаминар, каротинар, микроэлементар. Мебури сагъ аркьа анемия, авитаминоз, астения, ацIуна джуре итталара.

Хьедегьен гьер са хулаъ ай кканде завал акьуна рукъуттар хьичинра IамIалин цIаб э, тук э, иттар хьугуна чай акьуна ухас.

Салихат Малагусейнова