Исан кIилил алчархьа гьер джурейин хIаягъар. Ая хIа фикир ирцIанттар, ая кьацIра хIаягъ идефра ягъардахьуна алттархьаттар. Ме ая хIаягъарикес фикир дайина атас вейдава духттурарин ягъас. Гьер иса мебурин хIаягъ аркьа джалла ме кардихъди. Инсан дуньяйил садпегелай бадил хьу ягъалас хаб Iусе хьуна луькIе арайихъди рукьуна багулив фаяф духттур э. Агьал дуяйин варттал инсандис ая мункинвел гIаттивас ккане джурейин пешабур. Авалан вахттари ме кардихъас хIа гаф акьас верегъилди адавуйи. ХIа пай пешабур инсанари чиппи-чиппис ягIар акьуттар и. Миштти са пешабурикес, мус хьучира уйиттарикес, духттурвел э. Мус духттурдин пеша инсанарихъди адиф ичин, агьал ягIар акьас хьасттава. Фас пучин, гьемишан иттаттар сагъ аркьа джерехIер аверефи.
Фиштти ичира, духттурвел акьас гьер инсандин хунухиас гIешкъ ай кканде. Мебурин кар инсан кардилас айчIучира, кIичира къацIра хум вере пеша дава. Гьалра хIа инсанарикес унихьа ахттилатар авалан зурба пешакурарин эесибурихъас. Гьер итта инсандил алчархьуна сагъ акьу духттуран кьабахъас идже чIална дуьгIера кам вейдава. Миштти нагагь инсандис гиран-даккан акьучин сара гьучавес кканра вейдава хаб мебурихъди. Начагъди ая вахттуни инсандис хIаф ичира бицIиф ичра кканфе мезуран чIал э нахIекъди дава агъаф мезуран чIал сагъра аркьа кIесра аркьа пуна. Духттарара инсанар э мебуринра аве шавла хье вахттра, вахтт адава арара, айчира сагелай итта инсан кьастт акьуна мебурихъди ушу арайи муш кеве кумак акьасе пуна. Амма, фидегьен мебур зурбадалди аргвайчира, мебурисра кканди аве чуппихъди иджи тIушуна, саймиш акьуна, хIуьлмат акьуна.
ХIуькуматин курарил алди ая джалла хIа духттурара бицIи духттурара завал хьуна аркьа чуппин пеша курарин хIаягъ. Хум гьартай дава ацIуна исари ме кардис Iуьмур алийна кар акьу духттурара. Миштти, саймиш акьуна ушуне аларуцас Курбанов Сулейманалди, Ахмедова Аишайилди, Гусейнов Багаудиналди, фай савкьатара хье больницайин хIаф Багаудинов Магомедзаид Закирович, мин заместитель Омаров Муса Кубутаевич, духттур-кардиолог Абдуллаев Замир Магомедович.
Мебур ушуна уйи духттурар ацIуна исари джан алийина кар акьуттаре. Савкьатар далара мишттин инсанарис кканеф чуппихъди акьуная фикире. ДехIела гьер са пешайис кканчин духттур, кканчин мегIелим, кканчин сасра пешакурарис Iуьмур йина кар акьу иснанар хум гьартай ккандава.
Луиза Гусукаева