Ккелахъан угъал вея
Литикес чердах акье
Ле вас ккане руш гъая
Уликес буллах акье
Ме ахттилатар гьакIанттар дава. Мебурихъ ппара хIа мегIна хъая. МегIна фи э пучин хIьуппехъендин Iуьмурдин рекъ э. ХIуьппехъен пугуна хиял ве ме рехIетин пеша э пуна. Амма ме пешакурар зурба йиркIвар, цIуппе джанар хъаяттар э. Фас пучин мебури гIулин кучевал дагъай, Iурдин аяз дагъай чиппин джанарилас гъил гъушуттари суман кIилин Iуьмур байирдиъ фарта. Ппара загьматин кар э ме. Гьелбетта хIурин мукьариъ загьмат дадивуна вейдава. Мисалабур аяфе загьмат дивутти батIар гунира IуьтIанасе. Гьемиштти загьматин кIил идемарикес сад э Буршагъарин Малик хIадад.
Рамазанов Малик Абдулбариевич хефе Агъул райондин Буршагъарин хIуриъ 2-пе майди 1950-пе иса бицIи хизандиъ. Баб мин Рамазанова Тамари дад Рамазанов Абдулбари. Михъ хъая Iу чу хеттар, хъара чияр чуппар дахеттара. Дахеттар ичира амма хулаъ хизандин арайиъ мус хьучира маслихIет ай, зун вун дагъай, дадан бабан тарбияйилди хIа хьеттар э. Махьтабарин сифтта якьу класс ми хуруне Буршагъарин хIуриъ. Хабди аме классар хурас ушуне Курагъарин махьтабиди. 1974-пе иса махьтабарин хурубар ккиркIуна ушуне ме университеттиъ подготовительный курсариди юридический отделенин. Гьемисаас 1976-пе иса ме ушуне ватандин удигь бурдж йис. Агьалдин вахттари суман авалара хIукуматин гIедатилди джегьил шиникквар гъай уй армиди, Ватан ухIас. Iу исалас служба ккиркIуна адине учин ватанилди. Хурубар кеттарис службайиас адеттарис хIурариъ авала алтухъ хIукуматин курар адавуй. Сифтта ме ушуне джиларин бригадирвелди. Гьемисаъ кар аркьай са вахттра дахьуна мис гьучихьуне кар акьас Агъул райондин Типпигъарин хIуриъ милицавелди. Хьибу иса кар акьуна ме мукьуйиъ дадар бабари тIалаб акьуне микес кардилас айчIуб. Фас пучин чиппихъ хъуттурфуб бадалди. Гьер са шиникквдис багьа э учин дадан бабан чIал. ДехIела Малик хIадад кьастт акьуна айчIуне кардилас. Хабди ушуне савхоз имени «Арсугский» хIуьппехъенвелди 1991- пе исастегьен. 1991-пе исалас 2000-пе исасттегьен кар акьуне бригадирвелди колхоз имени «Дзержинского». Гьемисаъ кар аркьая вахттари йине мис медаль Заслуженный чабан Дагестанайин. 2021 пе иса колхозар савхозар адихьуна хьуне СПК (Сельскохозяйственный производственный кооператив). Хьуне СПК «Буршагский» ме ушуне кар акьас ме СПКйин бригадирвелди.
Ме вахттунис михъ хъай уй хизанар шиникквар. Хизан мин э Рамазанова ФатIима. Мебурихъ хъая гIуфу шиниккв са рушна якьу кIиркI. КIилдибурис йиная мебури высший образованибур. Джаллабурив фая хIуькуматин курар. ЯгIайин ягъас са кIиркI мебурин ая СВОйиъ.
Малик Абдулбариевичан чIаларилди милицавелдиас айчIуна хIуьппехъенвел акьубан пушмал хье ягъ хьефттава михъ. Гьер са кар авадан ве, инсан йркIв фай Iешкъунилди хъучушухаб.
Наибет Гасукаева