Раджабов МехIемад Раджабович (ХIуьнтабирин) хуф э 1914-пе иса Типпигъарин хIуриъ Агъуларин райондиъ. БицIигунанхаб кар аркьай хьуне ги колхоздиъ. ХIа хьухаб хIуриъ кар аркьай хьуне ги маслопромдиъ.
Киберан хулан багулив файуйи агъа са батIар хал, гьеге хал и агъа маслопромдинф, гьегисаъ кар аркай хьуне МехIемада. Хъара ми курар акьуне пекернайиъ, гуни аркьай, хабди хIуппарин бригадирвелди. Гидас ге ушуне Бакуйиди. Гисаъ ги кар аркьай хьуне «Лейтенант Шмидт» агъа заводиъ. Гин шиникварис чиппин дад кьацIра ягъайдава. Гебур лап бицIи ами ушуф э ге Бакуйиди. Тидас МехIемад кlин файдине 1967-пе иса. МехIемадан хизандис агъаф и РехIенат.
Абдуллаева РехIенат хуф э 1920-пе иса Типпигъарин хIуриъ. Уч бицIигунанхаб ппара курар алчархьу дишагьли э ге. Шувас весттегьен кар аркай хьуне колхоздиъ. Шувас ушухаб, кар хьуне РехIенатас райкомарин столовойдиъ. Тидас учис гъачархье гуни, ямаг гъай хьуне ми хулади шиниккварис. Гашар, мекIер хьас атуна адава ми учин шиниккварис. Са Iу исалас хъикIуне ге столовый. Гевус хъикIухаб, кар аркьай хьуне РехIената махьтабиъ усттуруджвелди. Махьтабиъ ге кар аркьай илгуне ацIуна исари, уч пенсиди весттегьен. Учин кар батIарди, йиркIфай арка дишагьли и ге. Джалла махьтабиъ хурай ая шиниккварис кканверефи РехIенат, учин шиникквари суман ХIетатай агъафи гис. Ппара идже инсан и, багунттис, къуншис ппара хIуьлмат кея инсан и ге. РехIенат кIине майдин вазала 2009-пе иса.
Мебурихъ хъайуйи ерхьи шиникв — Iу рушна якьу кIиркI. Асия хуф э 1941-пе иса. Махьтаб кIиркIухаб ушуне хурас Махачкалайиди, пединсттиттутин филологический факультет. Хуруна ккиркIухаб, кар аркьай хьуне хIуриъ махьтабиъ, хабди Гъудгъул махьтабиъ. Шувас ушухаб, айчIуна хизанара хъай ушуне Дербентиди. Гисаъра ацIун гагьди кар акьуне махьтабиъ. Уч пенсиди ушухабра кехIей ацIун гагьди кар аркьай хьуне махьтабиъ.
ХIуьри, махьтабиъ ккиркIуна муядпе классра, сара найчра хурас душуна, ушуне шувас. БицIи, цIуре курара аркьай экьуне ме. Хабди, хъай учин хизанара, айчIуна хIуриас ушуне мебур Сухокумскдиди.
Раджаб хуне 1952-пе иса. Махьтаб ккиркIухаб, ушуне хурас Астраханьдиъ финансовый техникум, банковское дело. КкиркIуна адихаб, ацIуна исари кар аркьай хьуне госбанкдиъ. Банк хъикIухаб ми кар аркьай хьуне райондин централизованный бухгалтериъ, уч пенсиди айчIвасттегьен.
Джамалудин, махьтаб ккиркIухаб, ушуне Ставропольский крайдиди хурас сельхозтехникум. Учин хизанара хъай дуламиш вей экьуне тисаъ.
Рамазана хуруне Хасавюртиъ профтехучилище. Хуруна ккиркIухаб, ацIуна исари кар аркьай хьуне Невинномысскдиъ заводиъ. Агьалра Невинномысскдиъ дуламиш вей экьуная.
Iебдуллагь, муядпе классдала дахуруна, ушуне хурас ПТУйиди Ставропольдиди. Тевус ккиркIухаб, учис фачархьу курара аркьай экьуне тисаъ. Хабди адине хIуриди. Акьуна учис хизанара, вей лиханас Iуьрусаттихъди хьуне ме. Идже пешабур кея устта и Iебдуллагь. Ахиран вахттари ги кар аркьай уйи Казаньдиъ. Тидас гебурин бригада гьикуне Новгороддиди, тидас ге кlина файдине хIуриди 2019-пе иса.
Н. Шамсудинова
