Агубарис хIуч ухшар э гъварас. Ке азман хIучар дуламиш ве Сибирьдиъ, Канадайиъ хъара Аляскайиъ. ХIучар ппара Iайи гудж кея нахширар э, ругъуная ваккалан кIилин джандак са багвулас сасра багвулихъди алдарка мебури. Силебар ая гиъ 42, гебур адахъухаба са вахттунилас гаш хьуна хIуч луькIе.
ХIуч гьава э, ппара гудж кеяф, гуьрчег, уларис аргва Iуьшуй са батIарди Iекв хъара Iайвелсуз нахшир э. Рудж э суьве ирхеф са-садарин ирхевел алве 52 см. Руджурахъ хъуттурфучин, ягIар акьас ве фишттин гьава айчин гин, хъел кейчин, ачухъди айчин. Хъара ягIар ве хIучарин арайиъ фи мукь файчин. ЧIичI суве э хIучан, Iу джарунф. Хьидин ахирахъди чIичI ккейчIва, Iурдихъди хаб ккегъучIа.
ХIуч Iайи тегIдефе, ппара сабур хъая зурба нахшир э. Са Iуьшан арайиъ гифас ве вес 60-80 км. ГIурчахъ ахъихьагуна ппара Iайи тегIди гьукка адишай 4-5 митIрилас вартт дегьен. Iурдана Iайи ибхьиас верегуна, гебур ве сур-суран хьилиъ панджар ишай идегуна рехIет вейдава ягIар акьас гебурин кIаратIиъ хьиму хIуч айчин.
ХIучари гьер джура унар аркьа амма хьес унихьа Iари гебури фиштти ав атайчин. Ав ата гебури зав курасти хъара гIуьбехъми. Гебури ав атас хъучучIа гIулин ахирари. Iайи ппара ав ата Iурдана чиппин кIаратIар аягуна. Гебури ав атаф чиппин арайиъ ппара манзилар аягуна. ЯгIар аркьа чиппин хулан хизанар найе нанди айчин, кIаратIин хIаф гIаттивагуна хъара мукьарин манзилар ягIар аркьагуна. Гебурифас ве четин мегIлумат фачиянас ав ата арайиъ, инсан бадил хьегуна, гIурч алчархьегуна.
Сагелай хIуч йиркIв алиянде, хуппай джуваб фачиянде. ХIучас хьибу митIрин арайиъ ве ниъ гIурчан. Гебурис ниъ ве 200 миллион джурайин. ФачикIухаба инсандис 5 миллион далара вейдава. Унихьа гебурис 9 км. дарагI, табиIэтиъ 16 км. арайиъ. Дуламиш ве гебур мугариъ барсукарин, песецарин хъара джуре нахширарин. Чиппи са-сагелай далара аркьайдава гебури мугар. Чиппин экьуная мукьарин багулив гебури кьацIра гIурч аркьайдава Iари арайиъ 7-10 км. ами арта.
Чиппин мукьар идеф ягIар хьас хIучари ниъ хъихьа, хъара панджар ахъуна арта кIурарик.
Жавгарат Хамазаева
