Ттиан ис хIуькуматин Президентин В.В.Путинан буюрмишвелди ттур йирхунаф э
ХIемзатов Расулас, Дагъусттандин Халкьдин назумчис. Са верш ис алттвея Расул ме
дуньяйиди яратмиш хьу ягалас, назумчи хье арайиъ андава, амма ми хьес атуна ирс
инсанар дуньяйил амедегьен гагьди илгванасе. Фас пучин, мин шаирар гьер инсандин
йиркIурас киркьва, гьегидегьен кьуват кея мин чIаларик. Гьер инсандихъди мин шаирари
учин рекъ джиркIе. Расула учин китабариъ гъададиву суалар адава- бабахъас,
дишагьлихъас, ватандихъас, ватанперасвелдихъас, игитвелдихъас, инсандин йиркIурас
багьа суаларихъас. Ппара китабар ликIине ми- «Год моего рождения», «Высокие звёзды»,
«Покуда вертится земля», «Берегите матерей», хъара джуреттара- амма кIилдин дуньяйин
ягIарвел мис файдине «Журавли» («Кьуркьар») агъа шаирана «Мой Дагестан» («Зе
Дагъусттан») агьа китаби. «Журавли» («Кьуркьар») агъа шаир Совет хIуькуматдин Ян
Френкель агъа композиторди алийина макьамилди, акьуне микес мегIни. Агьал ме мегIни
ун дахьуф, йиркIурас кидиркьуф дуньяйил баджат фушра аме, фас пучин, ме шаир Расула
ттур йирхIунаф и ватандихъас чиппин джигьил Iуьмурар йина, ме дуньяйилас ушу
аскерарис. Расулан чIаларилди, сад сайил алатIуна заварилас алттве джагвар кьуркьар
учис кина аскерарин джанатди вея руьхIер суман хьуне. Гьеме мегIни аттархьухаб, ацIуна
мукьариъ дегIвиас дайе аскерарис ишанар алийине чуле завариди агъавере джагвар
кьуркьар суманттар.
«Мой Дагестан» агъа китаб фиштти учи ликIиф ичин, Расула ахъаркьаф и, гьер
мукьариди ушугуна, кьацра Дагъусттандихъас ун дахьу инсанар гьучархьайи мис. Са
ахттилат верш гелай дакьас, Расула ликIине ме китаб. Миъ Расула завал акьуне кIилди
дагъусттандин миллатарин камаллувел, Iекьулвел, маслихIетдалди дуламишвел,
мисалабур, мастIалар, тамашинра зарафатин ахттилатар. Ппара мук ме китабиъ йиная
учин ахттилатарис яхуларин назумчи Абуталиб Гафуровахъай. Расула ппара хIуьлмат
аркьафи Абуталибас, фас пучин, ппара Iуьмурдин четинвелар, гашарна мекIер агу идеми и
ме. Абуталиба, назумчи хьастти, леджбервелар, къалайчивелар, суначивелар акьуф и,
ацIуна мукьариъ хьуна, Iуьмур агуна, камаллувел фаяф и.
Ме пунаттар кидавай, Расулан ягIарвел инсанарин арайиъ акьуне хъара «Горянка» агъа
поэмайи. Ме поэмайиъ Расула ахъакьуне, фиштти чIире гIедатарихъай дженг дивай, учин
йиркIуран мурадар бегьем акьас аттрукьучин Асият агъа рушавас. Асияталас чишна
гъушуна, ацIуна суварин хIурариъ хIахьу шиберира чиппин мурадар бегьем акьуне. Ме
поэмайилас кинура аттивуне, ме кинуйира Расулан ттур хъара гьавайиди гъадивуне
назумчибурин арайиъ.
Расул Iаре назумчи давуйи, ми ппара загьмат дивуне, чIире гIедатар адихьуна, инсанарин
арабур ачукъхьуб бадалди. Инсанар вейи милди насихIет гъушанас, маслихIет акьас.
АцIуна хIуькуматаридира ушуф э Расул, хIуькуматарин хIаттарихъайра гьучархьуф э-
Индира Гандихъай, Фидель Кастройихъай, хъара джуреттарихъайра.
СССРдин хIаттари бегьем гьава кьимат йине ХIемзатов Расулан кардис. Ме и Герой
Социалистического труда, лауреат гьер джурейин премибурин, мис йна уйи ппара
джавизар- якьуд Ленинан орденарна (СССР), Андрей Первозванныйдин орден (РФ), сасра
орденарна медалар кидавай.
Къа ис вея Расул хье джалга андавай, амма гин китабар, шаирар, гин мукьуйихъди пуна
Iекьул кея чIалар ягIара хье арайиъ аме. Вахтт гIартай са вахттунилас бадил ве
фитначибур, Расулан ттур куранас аркьаттар, мис тугьматар ататтар, амма са гагьра
вейдава, фитначибур чаб сад сайихъай гуланде, Расулан ттур хъара мерттедала вейдава.
А. Рамазанов