Рамазандин  ваз хъучадигуна  инсан джурегъилди Iайи  алучIуна кканде  учин  дин тIабиIат  акьас. Хьес  ягIа ме  вазала  акьу  идже курарин  савабар  ацIуна  вартт  вереф. Лиштти идегуна багун  кIилилди, диндин чуппар чиярилди алчушуб-алттушубра, хъара гебур са уса беркв акьуна хье диндин   гъавурдиъ ихьуб, дагIаф ягIар акьуб савабин курарикес э.

Хъара  ппара нуш ве  сивар  ухIай, сив гьатас  са суфрайихъ завал хьугуна. Ме чIаларис  дуьрхье курар акьуне  майдин  ахиран  числобуриъ Москвайиъра  Санкт-Петербургдиъ  хье  райондин диндин отдел просвещенин  хIатти  Гаджи Ибрагим  Курбанова, хье  Агъулдин, Дербентин райондин  диндин отдел просвещенин  хIафра  хъара  саIудар  саебура хъай  ушуне  ме  шагьурариди.

Дахи  димари  пуна  фулан  ягъари гьучархьасе пуна  хабар  акьуна уйи ме  шагьурариъ ая агъул  джигьиларис. Сив гьатас  хубджи  вахтт  ами са усал завал  хьуна  хутбабур акьуне мебури. Ме шагьурариъ сив гьартафра  агьал кьанайи идегуна  гиштти дакьуна вей  адавуйи. Москваайиъ инсан ппара  завал хьуна  аргвайи  джуре  шагьурдилас.

Гаджи Ибрагимара учин  багухъас  чухсагъул пуне завал хьубан  курар  задар атуна, диндихъас йиркIв руцIубан. Хье  джигьиларисра  ппара  гагьди даргвай аяттар агуне, дагIаттар ягIар хьуне.

Миштти э хье агъуларин  арайиъ  ислехIвел  вереф. Чиппин  багухъас ме маджлисар кIилиъ файшуттарира  пуне удигь  исарира  аркьай  идеф лишттин завалхьубар, амур хьучи  сае исара  акьасе пуна.

                             

К.Мирзоев