Гунин хIекъи багьа э. Джалла инсанарис ягIайдава, фиштти загьматилди ичин ге усттулилди адинаф. Сасадарин фикирдиъ ая, хIикатигI суман, гунивар гьегиштти дарарик кегъвефи пуна. Ама гиштти даваф, хьес ппараттарис ягIа, гуни акьуб фидегьен загьматин кар ичин.

ЯгIа зун ахъакьасе чвас, фишттинф ичин гунин рекъ кьваран ударилас, хье усттулилдидегьен. Удигьай хъучучIасе хьин хуппур даркубалас. Азман ттарахттурдихъ хъитIуна магъар, дарка гектарарилди хуппур. Хаб, ге хьуна ая къунар ругIас аркьа. Ге вахттуни, агрономди гIаттива батIар экIен тум узагунас. Акефуруна хIел хьуна ая джилиъ уза кьур.

Хаб кар ккиркIвайдева: Iул гIдархьас дарманар кичархъай, удобренибур ичай. Авала суман угъаларикк муш кихьай андава инсанари: чиппин загьматилди ахъарта хьед. Гьегидегьен загьмат дивуна, мехIсул бегьери ачагъа. Ге хъучархьуф, угъаларикк кичархьуна чIир верегунас, завал акьуна гьаттива. АйчIва хуппурилди комбайнар, Iуьшра, ягъра дагъай, гьаттива кьур.

БатIар ацIу кIетарин сумар Iайи уцас гIешкъра ве уцаттин. Сайихъ сад кьвара ацIу машинар ве складариъди. Гисаъ алахилина мертт аркьа машинарилди. Мертте кьур гъайка рагIариъди. Мисаъ кьур Iуьрччанде, хаб ругIуна аркьа гIур. Ме гIур рагIариас гъайка дикванариъди. Гисаас гъайка гуни аркьа мукьариъди. ТIишина, уджухаб э гикес вереф хIезур гуни.

Гьал фикир акьуна кканде, хьиму инсандин загьмат гIайчин гисагI. Гьелегуна э хье хIаттари агъаф: «Гунин кьадри дахьуттис, гунагь ппара э». ТIалаб э гьер инсандикес гунис кьимат йиб, гуни башттан дакьуб.

Расим Гучудадов