1957-пе иса Расул Гамзатова ликIине «Горянка» агъа назум, мисаъ ми ахъакьуне дагъусттанлу рушахъас, йиркIурас нуш дава инсандис шувас вес даккандеттихъас. Iуьрус чIала ме назум тарджума акьуне гьемишанди Гамзатован тарджумабур аркьа Яков Козловский агъатти. Милди аттивуна уйи кинура, ликIина уйи балетра.Ме назум хабди агвар акьуне дагъусттандин гьер са театрдиъ.
«Те вахттари зун ликIине назум «Горянка». Агвар аркьай хьуне гьер са Дагъусттандин театрдиъ. Ахирахъди фи хьунчин микес. Спектакльдин ахирахъди хIавел фая игита люкIегъилди хьуне ме руш. Зас Iегвал и зе горянка, гъил зурзайи зун ликIиф ахиран кIес аркьа ара, ама завасфера акьасра вей адавуйи ахирахъди, гьегиштти хьуна кканди уйи гисаъ. Авар театрди аф агъилди агвар акьуне ге спектакль, заласра Iайи Iегвал хьуне хъуланттарисра, гебур гъавурдира уйи джуриштти гисаъ ахир давеф.
Амма даргинский театрдиъ са чIукь духIуба акьуна агвар акьуне. Гебури кIес аркьа ара духIуба акьуна агвар акьуне куч кьатI аркьай. Амма ге кар хъара Iейибин кар хьисаб аркьайи рушас, ичира кIес акьуб дала иджи э пуне гиштти.
Ппай кумыкский театрдиъ маслихIет акьуне е кIесра дакьас, е кучра хъадатIас. Мебури сукьур акьуне. Ме кар хъара Iайи э, ичира горянка илгуне джанра кей кучра хъами. Ке Iайи рехIети агвар акьуф чеченарин театрдиъ. «Фасе кIес аркьаф, фасе куч хъартIаф, фасе сукьур аркьаф», — пуне гебури. Экьурай сагъди джанра кей.
Гьер са режиссерди чиппис кканегъилди агвар акьуне ме назум. Амма сайира ягIар акьундава чиппин кумакилдина,Iегвалхьубалди гебури зе назум кIес акьуф идеф», — йиркIурал акьуне Расул Гамзатова учин «Горянка» назум агвар акьубахъас «Мой Дагестан» агъа китабиъ.

Батитай Габибулаева