Гьиндюшка – ке Iайи учин эесси кканвере хулан нахшир э. Амма хасиятин иджеттар дава гебур, сасра хуларин пеIерихъай укъай аве дуьхьуьна эркьвайдава кьацIра. Сасрабурихъ хъуттурфуна, мин джан ке хIаф э. Гьиндюшкайин къуппул алдея ирхе хъехъв суманф. Гис хъел адегуна тушас аркьай аве кил хъара дархъа пурцIар руджра хъай.

Гьиндюшка хулан пеIерикес ке идже бабар э, чиппин чарккварихъас суман сасрабуринттарихъасра ахъаджихlа бабар э гебур. Эессибури гьиндюшкабурик кичархъай аве гъурагъалар пеIерин, урдагарин, къазарин. Ме сабур хъай эркьва учинттар суман сасрабурин чаркквара айчlвасттегьен.

IуьтIанас хулан гьинюшкабурис фачиянде кьур, кlаре гуни, IуькIер, руьхьуь калтуфар.

ВехIши гьиндюшкабури Iелде милехъвар, Iаваницаяр хъара сасра джуре милехъвар.

Джуре яккаригь гьучикIухаба, урдагин якк ке муфеlэтинф э. Ме яккугI гIая ппара минералар (железо, магний, селен, калий, марганец, цинк) хъара витаминар (А, В2, В12, РР). Малдинра хIуппалан якк далара урдагин тегIди хIел аркьа инсанди. Ме яккугI чукь калорибур гIая, амма уч якк ппара муфеlэт кеяф э.  Чукь Iеле инсанарис ке идже мукь э, кьудакь алтивуная урдагин мухур (100 ккал. ая/100г. яккуъ), хуппай якк кканеттарис хилин кьаб IуьтIуна кканве хъара лек (208 ккал. ая/100 г. яккуъ). Джуре яккариъ дала урдагин яккуъ ке чlукь э холесттерин гlаяф.

Гьиндюшкайикес хайир ппара э. Гебур хIа ве якьу-гIуьфу вазалан арайиъ. Джагвар гьиндюшкабур ве чIукь килавар аяттар, яIанигI гIая яккун килавар аяттар хъара азманттар. Мебурис найе гьавайил кканчинара кегьей дуьрхье.  Джагвар гьиндюшккабурин аттархьа къанна хьибу-къанна гlуьфу килав. Суре исалас гьиндюшка руккун кканве, ами атугуна гил мав алгъавей эркьва.

Жавгарат Хамазаева