Гашинвел инсандин кечIирхIе тIулар-тIабиIетарикес э. Ге зад гIачахъуна ккандава вахъ хъая девлет ухIас ягIархьубахъай. Гашинвелди Iелди э инсандин иджевел. Ги гуланас аркьа яхI, ламус. Ге гидигьен фун дарцIа шейъ э, гьадихьа хIалалдин къайдабур, айчIва Iейибин къайдабуриас дадар-бабарихъди, шиниккварихъди чуппар-чиярихъди, хизанарихъди, саебурихъас хъара агъайра адава зун.
Фидегьен акьуна ая дакканвелар, фидегьен чIир акьуна ая Iумурар, фидегьен ушуна ая ме дуьйилас инсанар, сад сайилас гъил дагъуйуна. Гашинвел аме ме дуьньяйил,хъара зурбара вей ая.
Багухъас хъуттурфуна вафас ягIаракьас хьасттава ме гашинф э, ме гIанеф э пуна. ХIа паяр гебуригIас джемеIетигI гIаве ттур ай, чаб гъургъай аве чIирхIевелар, гашинвелар маркьа агъай. Саебурин гъалатIар аттивай, вардиш аркьай аве. Амма учихъ хъуттурфуна, учин аркьай ая курарихъ хъуттурфуна, фишттинф э зун пуна дуз хьас кканди адава.
Нандиъ айчира давей аеф э гебуривас чаб дуз акъас. Гашинвелди агуна кканегъилди агвас артайдава вес ме дуьнья, ме Iуьмур улар алакьуна дархъагунас алттархьаф идеф. Гишттин инсанарикес ппараттар аве учин курар даргвай сасрабурилди тIуб даргъай, сасрабурик келхъенттар.
Хъара тамаш э, ме ликIина ая хатIар хуруна чиппихъас хьастава гебурин фикирар, сасрабурихъас хьасе. ЦIаку рекъди ушуна къазалмиш акьу девлетарин сайисра иджвел хьасттава. ГьакIан вахттунин Iемалар э. Гебур кидавай, гашинвелди учис кидавай, уч ме дуьйилас ушу хабра балабур ами арта учин валадарис, багу-кIиларис. Чун фикир акьуна айчи гашинвел гьеммишан хъай аве зулмуйихъай. Хье диндиъ агъая, гашинвелра, залумвел иман загIифди аяттарин э пуна вереф. Ге кар ппара гагь э ягIай. Ге чIирхIе курарин дарманра ппара гагь э ягIай, са рехIеттира э.
Гьамиша кьимат тин вун аркьа курарис. Вун вас суал алихьай акье «Кьабул хьасигьан зас, нагагь зас ме кар акьучи?»
ЧIалар ликIенас, ликIиттар хурас рехIет э, амма хIекъдан зурбабур э ге кардин учис джуваб йис вереттар.
«Вун вас кканди аяф, ве диндин ччуччус дахьуна кканедегьен гагьди ве дин бегьем хьасттава».
МуьхIтал ве чIиревелдин, залумвелдин кьайда адаттари хъургъагуна, чиппин чIирхIе курар аркьагуна гъилар ккедикIуна дуьгIа акьучи джалла кIиркIваф суман.
Ахирахъди пас кканди ая: «Хулаъ ая хIаттилас э бицIиттира тулар-тIабиIатар гъуланф. ХIатти Iегв агвар акьуна кканде хулан хизанарис. Удигь кIил вун уч дуз хьуна кканде, хулан хизанар дуз акьастти. Дуьньяйил Iайвел муза, узу шей кегъучIасра э. КехIа кар кьабахъастти пушмал дахьуб».
