Хье гьава агъул суварин ухьтанвелдил мус хьучира инсанар муьхIтал хьуна амилгванф и. Гьеме кардихъас идетаре учин тарихдин рекъуьъ ме суварилас зайдайи дусттна – душман алайшуф. Мисаъ авал заманабурихъас мич ппара алгъавей алайшуне инсанарин Iуьмурар. Гьер са заманайихъ хъаве учис хъудуьхьуь инсанар, курар – лихунар, иджвеларна Iайвелар, тамашибур. Инсанарихъас хьин гъургъучин, хье халкь ппара зурба халкь э. Мус хьучира сад – сайин гъавурдиъ ай, сайи – сайис гъил гьучихьай кумак аркьай, чиппин ягъ — гIуьбехъ аркьай Iуьмур гьикуттар э мебур. Вахттар ккеттвередегьен, Iуьмурара са хубджи ушуная. Гьелбетта, авалдихъ хъуттурфуна духIубавелара ацIуна хьуная. Амма са духIубавелариккра кIил ккидийи курар аме. Мебур хье джемеIетин загьматлувел, зурбавел, гуджлувел, игитвел.
ЯгIайин ягъа хьехъди рукьу тарих агугуна, хьевас лап хIа дамакъ акьас хьасе хье алттушу несиларин гьунарлувелдил. Нае кардин удигь кканчира лиIарин къармахар суман цIуппи лекар ишина гъурзанттар э идемар, асландин йиркIвар гIанаъ икIуна, чиппин яхIна – намус фай аруцаттар э дишагьлибур. Чиппин иинра эмкIен тIинкIар хардж аркьай ватан, хал – хизан ухIая халкь – махлукь э агъулар.
Хье алттушу несиларилас чишна гъушуна, ягIа хьинра хъаттархьуна ккандава мебурихъас. Мебури хьес йи насихIетна Iекьул, гIедат афухIуна хьинра фачийина кканде шиниккварис. Гьелбетта, вахттар алттвередегьен Iуьмурдин шартIара ппара духIуба ве. Миштти идегуна, вахттунихъай лек алдихьагуна авалдин гIедатара кIвалас гьатуна ккандава, мебурихъай цIае гереквелара ягIар аркьай кканде.
Магьа хье агъул райондиъ джигьиларис, бицIиттарис эл ккеттвес, йиркIв алатас ацIуна усар арайил акьуная. Типпигъарин хIуриъра цац, удигь иса акьу паркар кидавай, ттиъра акьуная цIае парк. Багъариъ администрацин багулив фая паркунихъ хъара хъучихьуна хIа акьуная ме. Мебур удара гIачихьуна азман хIа манзил хьуная мисаъ.
Ме курар арайил аркьаф «Комфортная городская среда» агъа программайин проектилди э. Фиштти кIили файшуна ме кар идарайи акьунчин, ахттилатар акьуне райондин МБУ ОКСдинра ЖКХйин хIатти Шабан Шабанова.
«ЦIае парк акьуне «Комфортная городская среда» агъа программайин проектилди. Ппара батIарди, мехIкамди акьуна арайил акьуне ме ус. Акьуная мисаъ бицIи шиниккварис дурухIалар аркьа площадкабур, эл йирхIагуна алчаркьва мукьар, хъара ая мисаъ тукар, кIурар уза мукьра. ДегIвин иштаракчибурин мемориалихъай батIарди атIуна ахьасе ме гъазе муртт. Ме тукари, кIурари чиппифас вере чугъсагъул пасе хье игитарис.
Паркунин аваданвел вартт акьуб бадалди пул ачухъ акьуне федеральныйна, республиканскийна, райондин бюджетариас. Са чIалалди, кIилди акьас кканедегьен курар арайил хьуне. Мебур арайил акьу усттабур фушар э пучин, мебур подрядчикари чиппи гьикуттар и.
Ме цIае парк хье джемеIети Iари аруцубарисна эл ккетубарис ишламиш акьасттава. Мисаъ хьин аркьай акьасе хье джемеIетис, райондис, республикайис, хIуькуматисра лазим иде мегIракабур: Гъалибвелдин Ягъ, Ватан ухIа аскерарин Ягъ, хумбарин хIаягъ, хъара джуре мегIракабура», — ахъакьуне Шабан Шабанова.
Гьемишттин мукьар фидегьен ппара акьучин, гьегидегьен иджи э хье шиниккварин тарбийис. Фас пучин, ягIайин ягъанис кегъархьая джигьиларис ацIуна хатIайин, зарарин рекъер ая. Нагагь сагелай чIире рекъуьъ архьучин, хабди ппара четин хьасе дуз рекъ мебурис агвар акьас. Мишттин усариъ аверехаб, шиникквар хье уликк ккихьасе. Дава кураригIра гIачархьасттава.
Гьер са даданра – бабан мурад – матлаб э чиппин валадар чиппин юлаъ ай, дуз рекъди вереттар хьурай
Салихат Малагусейнова
