Авал вахттари ахьуная са къарина къуджа. Яшамиш вей уйи мебур лап Iайи касибди. Хъудавуйи мебурихъ шиникквара. Фидегьен тIалаб акьучира, Меккайилди ушучира, шиникквар хьундава мебурис. Са ягъарикес са ягъа адиная мебурин хIуриди са цIиганарин хьир. Ми пуная мебурис багу вахттари хьасе шиниккв. Амма джалла шиникквар суманф хьасттава. Мин чIалар унихьуф шад хьуная къари, баладава пуная гъваран ухшарар аяф хьучира, шиниккв хьухаб. Зас ягIайдава, пуная цIиганкайи, фишттинф хьас ичин, чвас лидегьен Iайи кканчин, гъваран ухшарар кеяф хьурай.
Ми пугъилди, са вахттунилас хуная къарис шиниккв. Сасагелай инсандин тагьар кей хьуная ме шиникквдик, сасагелай гъваран ухшарар атай хьуная. Миштти ичира, ппара рази ахьуная мебур чиппис йиная савкьатил. Гаджи агъа ттура алийина, ухIай ахьуная мебури. Сасра шиникквар вазала хIавере кьайдайи мебурин Гаджи хIавей хьуная са ягъан арайи. Хьуная микес са зурба, кьуват ая шиниккв, дадар-бабарил йиркIвра алиланди. Амма са кардихъай рази вей давуйи ме, мис ахттигьар адавуйи раккагьди аттвес, тIагарарихъди гьучавес. Айчира учис алийиная къадагъабурил рази хьуна эркьвайи.
Са хьидин ягъа Гаджи аттушуная хулаас. Iуьшас рукьасегьен агъай ахъутIуна дадна бабра ахьуная, амма шиниккв адина адава. Миштти алттушуная са-Iу ягъар. Мебурин паччагьдис пуная къаравулари гьер Iуьшуй паччагьдин хуларин раккарихъди гъваран кIил але шиниккв бадилве пуна. Паччагьди Iудтти ппара алийиная къаравулар.
Къаравуларигьас гучI хьуна адава Гаджис, ачадаркуна мебура са чIалра дапуна ачушуная ме хулади. Ачушуна гIанади, ме дивуф дивуна ушуная паччагьдин рушан Аминатан хулади. Гъархьуная рушан чIарарик кирхIуная ми. КетIуная Аминат, мучIаас мис чиппин хулан гъуй суман хьуна, кIилилас гап алайхIуная. Ме арайи Iеламат хьуна, гъваран кIиликес хьуная инсандинф. Хьуная микес ухьттан шиниккв. Паччагьдин рушас кканхьуная Гаджи. Багамин гагь хьугъилди верегъилди хьуная Гаджи паччагьдилди руш тин пас. Хулаас аттушугъилди, хаб хьуная микес гъваран кIил алеф. Паччагьдис агуна мин гьава, алчикуная учин къаравулар. Мин гуджлувелди джаллабур хъай фадахъуная. «Фи вас закес ккандеф?» — пуная паччагьди. Гаджи пуная мис учин тIалаб. Рушан дада, мин гьава аргвай, фикир акьуная, фи багьана акьуна алдихьагьан пуна.
— Хьурай, — пуная ми, — зун рази э. Амма сагелай вун акьуна кканде зун пу са кар. Хъая захъ са Iа хIейван. Чин гис Iелефра кехIей тIагариас ккерхъай ухIаф э. Гилди ачушу гIуьфцIур шиниккв кIиная. Вун хIейвандинра эвел акьуна, кIеттара аттфайдина арайил акьухаб йисе зун вас Аминат. Рази хьуная Гаджи. Шад хьуная паччагь, ме учин кIилилас алттархьуф хIисаб акьуна. Ачушуная Гаджи хIейванарин салади, са арайилас, алекьуна хIейвандилра, аттиная ме. КIеттаринра къайгъу акьуна ая ми.
— Вун акьуне зун пу кар, амма са кар сара аме вас, — пуная паччагьди. Гьал эвел акье че гъурурин. Ачушуная Гаджи гъурурин салади, гъаттивуная Iаттарна иджеттар. Iаттар файшуна алахъуная дагьарилас ахтт. Гъурурихъай учра алайхьас гучIай, рази хьуная паччагь.
Унахъуная Аминатас джуваб агвас. Ме, алтухъ фикирар дакьуна, рази хьуная. Хьуная Гаджикес хаб ухьттан шиниккв. Акьуная ери ягъди цIакIинар. Мисаъ уйи цIиганарин хьира. Хабди ми пуне Гаджикес паччагь хьасе пуна.
Луиза Гусукаева
