Ме иса Дагъусттандис мункинвел хьуне хIедждал гьикас 1000 инсан Сулейман Керимован кумакилди. КIилди ме кар арайил акьуне Муфтияти, Керимован ахтигьарилди арайил акьуна бехIсунин мегIрака. Ме мегIракайи пай акьуне путевкабур Дагъусттандин гьер районарин хIурарис.
КIвал акьасе, Агъул райондиъ путевкабур аттархьуне хьибу инсандис. Сад Тамам Рамазановнайис, Типпигъарин хIуриъ махьтабиъ кар аркьая магIелимдис. Михъас чин ликIине алтушу хIефттайи. Iудпе путевка хьуне Рамазанова Фатимат Джамалутдиновнайис.
Рамазанова Фатимата кар аркьая Типпигъарин хIуриъ музейди. Час Фатимата ахъакьуне, фиштти учис кьисмат хьунчин бахттун кар ( кIедж).
— Чвас джалабурис гьеме вахттунин хайир! Зун дуламиш вея Агъул райондин Типпигъарин хIуриъ. Кар аркьая райондин МКУ «Историко-Краеведческий Музей» агъа усаъ 2004-пе иса башламиш акьу ягъалас мич ягIайин ягъасттегьен. Захъ хъая хьибу шиниккв. Шував зе хIуькуматтин курар фадава. Мал-кьара ухIай, дуламишвелар аркьая хизандин. Хье исламдин диндихъас, фарзарихъас ке ппара, зун бицIи ами, ахъаркьайи че хIабаба. Амма хIа хьасттегьен, фикир акьуф дава ме кар бадала. Ке ппара зас кIвалди аяф, зун бицигуна хIабабахъай суьхIуьрар акьас гъайшай вейи чин чиярихъай, сасагелай ухIайи сивар.Сив ухIуттис ширинар ирцIанди, хIуьлмат аркьайи, йирквI гъадивайи че хIабаба, хъара къунши хумбари шад аркьайи чин, чвас савабар ликIенасе, хIаягъарис чин чвас батIар савкьатар йисе агъай.
Баб че кьанайи хъучучIуф фарзунин тIалабар бегьем акьас. ЯгIайин ягъас зун рази э, бабара аркьая учин къулгунара, ухIа сивара. Зун йиркIураастти хъучучIуф къулгунар акьас, сивар ухIас зе 28 ис хьухаб э. Зас кIвалди аме, зун кардик хьуна, са вахтт хьухаб хъучучIуне гирами Рамазандин вазала.Че кардил але илдешари джаллабури ухIай уйи сивар, аркьайи къулгунар. Мебурихъай зера гIешкъ хьуне. Гьемиштти ухIуне зун кIилди вазала сивар, гIадартай акьас хъучучIуне къулгунара. Хабдира, Рамазандин ваз ккиркIухаб, зе кардин илдешари хIефттайи Iугелай итни ягъана химис ягъа ухIайи чиппин гIайшуна сивар, аркьайи чин кардил кьазайин къулгунар.
Хъара зун хурайи «АССАЛАМ» агъа газит, китабар, хье шериIетин тIалабар ягIархьас. Гьемиштти зун кьаза акьуне кIилди зе фарзунин къулгунар. Сиварин бурджар кимичира, амма къулгунар кIилди зун къаза акьуне, йине къулгунин кафаратара пулулди. Миштти идегуна, зас ппара чугъсагъул пас кканде зе кардин илдешарис, зе йиркIв диндихъди цуппе акьуттарис. Сайиштти чугъсагъул пас кканде Зумрият Курбановнайис, гьеми ппара маил акьуне учин багухъас, зун гIайшу сивар ухIа вахттуни, зе гIешкъ датIаc ми учинттара къаза акьуне. Гьеме вахттуни зун аликIуне хиджабра.
Хиджаб аликIу вахттари, чIалар агъа инсанар ппара хьуне, къулгун акьучира, сивар ухIучира кIилил гьеле алдикIучин вейду агъаттар. Амма зе кьастт зун дегиш акьундава, йиркIураастти шад э зас амур хьубас ме кардис.
Агьал зе хизандихъай чин алучIа шиниккварихъай гъургъас, диндихъас ахттилатар акьас, къулгун вахттуни акье пуна тIалаб акьас. Мебурис вахттуни ягIар хьуне чиппин фарзар.
Путевкайихъасра ахъакьасе зун чвас.
Ке удигьай хье райондин имамди джумIе ягъан къулгуни хабар йине хье райондиъ бехIсунин мегIрака хьасе хIедждал гьика 35 инсандин арайиъ кIур ихьагъилди. Зунра, завал акьуна лазим иде кIеджар, фачийине хье райондин имамалди. СанаригI зун гIайчира, амма хье райондиъ хьибу инсандилас вартт хьасттава. Мебура гIеджиз аттдарукьа хизанар.Сара муш кидавай экьуне зун, хаб хабар йине хье райондин имамди Юсуф Нурисламовича, зе ттур аттархьуне пуна. Удигьай шад хьуне хъугъасра кехIей вейдавуйи. Амма кьисмат ппара хIа шейъ э инсандис. Гьемиштти идегуна э агъаф, кьисматиккес датIурай.
Наибет Гасукаева
