Гирамин мусульманарис багьа Рамазандин вазала Агъул райондин Типпигъ хIурин мазгитин имамди Муса Мусаева мазгитин инстаграм каналиас хабар йине шиниккварис эльхIем дузди хура конкурсдихъас.Мишттин конкурсар аркьай магьа ттиъ хьибу ис э хъай. Якьу инсан и ме конкурсттин спонсорар: Баджаева Римма Суфиомаровна, Гасаев Магомедрафик Джамалудинович, Магомедов Рамазан Назимович, якьудпе спонсордин ттур варттал аркьай адава.
Ме спонсарари чиппин багухъас ме кардис адихьуна уйи къана гIифу агъзур манат пул. Мисаъ уйиIу гьерджурейин шартIар.
Садпеф, гьина дузди эльхIем хурайчин.
Iудпеф, гьинас ппара джемеIетин комментарибур хьучин.
МисагI гIачучIас ахттигьар уйи джалла агъуларин мактабиъ хурай ая яшарин шиниккварис. АйчIуна сасра усариъди
ушуттарисра ахттигьар уйи. КIилди ме конкурсдигI гIачучIуни ягъцIурна Iу шиниккв. КIилин вазди шиникквари ппара алучIуне ме конкурсдиъ идже мукьаригI гIачархьас. Гьер са шиникквди сифтта чиппи хуру эльхIемин видео гьикайи имамдис.
Ги учин багухъас хъуттурфуна фи гъалатIар айчин пуна дуз акьас аркьайи. Са ппараттарис вархабурихъ хъаяттарис гьикайи эльхIемин дузди хура видеобур, йиркIв алийна ягIар акьурай пуна шиникквари. ХIурариъ аяттари чиппин мазгитариъди, гIелимарилди вей ягIар аркьайи. Гьемишттин конкурсар аркьаф гьер сабагв фикир акьуна э. Ке удигьай, эльхIем къулгунихъ хура фарз-дуьгIе идехIела. Мин дузвел къулгуниъке хIа шартI э. БицIи ами шиниккв фиштти
алархьучин илгванхIела аркьафе мишттин конкурсар.
Сайишттира хье мазгитариъди шиникквар ве дарсариъди. Мисаъ мебурис хIерфарихъас башламиш акьуна ягIар аркьа
къурандин гьер джурайин аятар. Ме конкурсдин ахирахъди гьина дузди хуруф хабар акьас имамарихъай шиникквар ушуне Типпигъарин Дуьхьелди агъа чIириъди. Мисаъ мебури башламиш акьуне са-садтти ттур агъай иджи, дузди хуруттарис призар.
Садпе мукь гъуйуттис уйи хьибу агъзур манат пулун, Iудпеттис-Iу агъзур, хьибудпеттис са агъзур манат пул.
Мебур:
1. Гаджиева Марьям 3 класс (Махачкала).
2. Гамзаев Сейфула 8 класс (с.Рича).
3.Ибрагимов Абдулла 3 класс (с.Тпиг),
Мирзоев Мухаммад 4 класс (с.Тпиг), Курбанов Абдулнетиф 5 класс (с.Тпиг).
Хабди гIаттивуне хьибуд джемеIетин комментарибур ппара хьуттар:
1. Ибрагимова Заира 6 класс.(с.Мисси)
2. Гусукаев Амир 6 класс (с.Тпиг)
3. Курбанов Магомед 6 класс (с.Тпиг).
КонкурсдигI гIачучIуттарис ме дуьйин нигIматара, те дуьйиъра савабар хьурай, пуне Типпигъарин имамди Мусайи. Аме шиниккварисра джалла ме конкурсттигI гIадегьенттарис йине савкьатар, шиниккварин йиркIвар гъадивас, хъара сасра нубатариъра гIачучIас, хъара иджи гIешкъ хьас ягIар акьас.
Маджлис арайил акьуттари шиниккварис хъара акьуне хIуьппехъенарин хинкIар, чай, гьер джурайин дурахIалар. Мисариъра дире идеттарис йине бицIи-суман савкьатар. Мич адис дахьу, вархал але шиниккварин савкьатар Типпигъарин медресейиъ атуне. Мишттин конкурсар ппара иджи э шиниккварис.
Са багухъас учин дин-тIабиIет, тарихъра ягIарве, сасра багухъас шиниккварис агьал телефонаригьас, интернетаригьас фера джуре тамаш адава. Мишттин конкурсари шиниккварин
гIешкъ гъадива.
Луиза Гусукаева
