Гьер са заманайихъ хъаве учин дарди-бала, кьайдабур. Заманабур гьерттар ичира, дунья сад э. Дунья духIуба хьуная агьай ве. Амма дунья мус хьучира учин кьайдайиъ амилгванде. Iурдра вей аме, гIулра, ягъра вей аме, Iуьшра. ДухIуба вереф гьер са заманайин инсанар э.
Инсанаринра Iуьмурдин шартIар, йиркIуран ниятар духIуба хьучира, валадарихъас мебурин ниятар мусра духIуба хьасттава. Дадар–бабари чиппин валадар ухIуна хIа аркьа ислехIвелдис. Амма ватандин кIилил са бала гъамаз хьугуна, е джигьиларивас хабар гъуршандава ккандев-кканду пуна, е дадар–бабарин йиркIвариъ фи айчугайдава.
Фас пучин, хIуькуматин хIел тушкин хьу вегIдайи, хьин ке Iайи кIвал акьас алучIа тарих. ДегIвин ахттилат ккеттархьу вахттуни, ке удигьай йиркIураъ ирхIа хье ватандин хIа дегIви. Ме дегIвиъ инсанарин кIилил адидегьен ягъарна–Iуьшар, джемеIетис хьудегьен азиятарна четинвелар. Гьелбетта, ке удигьай кIвал ве хье Советский Союз хIуькуматин халкьдин дженг, игитвел, зурбавел. Фидегьен хIейиф хъайчира, лап хIа дамакъ аркьа хьин хье игитарилди. Мебурин зурбавеларна, мебури ватан бадалди диву дженг сайисра кIвалас душурай пуна ахъаркьа хьин мебурихъас хье шиниккварис, хуттуларис.
Амма йиркIвариъ чIире ниятар ай, гъиларив дегIвин пайдагъар фая инсанари хье джемеIетис дегIви хум вес артай адава. Тегуна хIададари душманарихъай дженг дивуна ичин, ягIайин ягъа магьа мебурин хуттуларина путтулари чиппин ватан бадалди загьмат дивая Украинайиъ гъаре дегIвин операциъ.
ЯгIа гьалдин хье джигьилари чиппин бурдж ирцIанде ватандин удигь.
Мобилизация хъучучIуна ая пуна хабар акьухаб мич хье хIуькуматиас агъзурарилди джигьил шиникквар ушуне СВО аркьая джилилди, чиппин дадарин ватандин ислехIвелдин шартIар ухIас. Мебурикес хIа паярихъ хъая таджриба фи э пучин, са исан арми э. Миштти э пуна мебур хаб чукIундава. Гена гьеме тушкин вегIдайи, чиппин цIуппе кьасттунилдира гъалиб хьубахъ хъая хъугъубалди гьертти учин багу кIиларин йиркIвар сакин акьас алучIа мебур.
Гьеме джалгабуригI хубджи гIая хье Агъул райондин джигьилара. Сур мобилизованныбур, сур контрактникар.
Мебурикес сад э Алавдинов Мухтар Рамазанович. Мухтар Рамазанович Iу агъзурна садпе исан къана якьудпе февральди Агъул райондин Арсугъарин хIуриъ Рамазанра Марина Алавдиноварин хизандиъ хуне. БицIи Iуьмурдиъ ами ме ппара нашетIин, ачухъ йиркIуран, элхъен хъуьсуйин шиниккв и.
Махьтабиъ хура вахттунира мин ппара батIарди хурубал йиркIв алефи. Хуруб суман, джуре багвара иджвелинттар фай уйи мив. Сакинвел, гьерттихъди йиркIв руцIуб. Дусттвелдил Iешкъ хьуб, кумак кканеттис гъил гьучихьуб, бицIиттис, хIаттис хIуьлмат акьуб.
ДехIела ягIа хIурин джемеIетин багулихъасра Мухтарас зайдайи хIуьлмат ая. Джаллабурин чIал сад хьуна дуьгIебур аркьая, чиппин ке ккане кумакчи нандиъ айчира сагъ – саламат хьурай агъай.
Махьтаб ккиркIухаб, Мухтар Дагестанские Огни агъа шагьурдиъ медресейиъ учIуне хурас. Мисаъра са иса дала дахуруна, фадихьас алчархьуне. Фас пучин, повестка адина, ватандин удигь учин бурдж йес, Мухтар армиди ушуне. Армиъ ме хъитIуне хьибу исан икьрар, кьиматигьас аскервел акьас. Хабди чиппин хизандин хIел четинди ая хIела, мебурис кумак бадалди, икьрар чIир акьуна, Iу агъзурна къана Iудпе исан февральдин вазала адине хулади. Гьеме исан сентябрьдин вазала мобилизацикк кичархьуна, файшуне Мухтар СВОйиди. Файшухаб са хIефттайи хьуне ме джуре мобилизованныбурихъай Краснодар шагьурдиъ. Мисаъ мебурис иде – даваф ягIар акьуна, хIезур акьуне дегIвийихъди. Ме хIефтта ккиркIухаб, Мухттар Рамазанович ачархьуне СВОйин ке удигь гьая джалгабуригI.
Iу агъзурна къана хьибудпе исан садпе январьди гъилис ппара хIа йирхIун хьуне. Ме йирхIунис мелхIемар аркьай, кьандисттегьен Москвайин госпитальдиъ хьуне. Гьал магьа Iу хIефттадегьен э ме хIуриди адина. Адина хулаъ айчира, гъил мехIелдис иджи арайил алчархьуна адава. Удигь гьаме хабди акьуна ккане операцира.
Фидегьен дадар – бабарин йиркIварин Iуьрар ичира, хабчукIасра кканди адава мис. Нагагь гъил арайил хьуна шаб пучин, хабра весе агъа уч ватан бадалди.
«Зун учра хIа акьуфе зе дадана баба хIаттарин зурбавелдинра загьматин чишнабурил, зе шиникквара гьемиштти хIа акьуне зун, ягIа магьа зе кIиркIакес чишна хьуне хье алгъархьая несиларис. Гьемишттин асландин йиркIвар ая игитар мусра кам дакьурай хье халкьдихъас», — пуне Мухтаран дада.
Салихат Малагусейнова
