ДегIвибур дуньяйилас ппара алайшуна айчира, хье фикирдиъ ке хIа дегIвибурикес сад э Ватандин ХIа дегIви. Са агъзурна ерчIу вершна ягъцIурна садпе исан къана Iудпе июньди хабарсузди Гитлеран кьушум гьужумдилди хIевалат хьуне хье хIуькуматил. Ме ягъани хье ватандил гьарай гъурзар акьу ягъ хьуне. Сайисра ягIай адавуйи, фидегьен гагьдисттегьен давам хьас ичин ме дегIвин дженг. Ичира са хьиму миллат гIачахъуне, хье хIуькуматин халкь джалла сад хьуна гъайшине чиппин дадан ватан ухIас. Зурбадалди тарг аркьай душмандин аскерар, машинар, самолетар дагъай, са чIалалди, фи улакь файчин, фи яракь файчин, гьегебур кIилди батна барбатI аркьай. Ватандин рекъуьъ чиппин Iуьмурарна джанара кехIей хIейиф даркьай. Хье аскерар, чиппин джанарилас гъил гъушуна, са гучIра адавай алгъузуна уйи ватандин дазубур ухIас.
Гьелбетта ппара кIине мебур заварил, джиларил, хьеттарил, чиппин алттушу вахтт, але вахтт, хьасмиде вахтт ухIай. Те вахттуни мебурин баджат йиркIвариъ, фикирариъра кехIей уйи чиппин гьунарарил дамакъ акьасе пуна ватанагьлибури, багу кIилари, хизанари, шиникквари, хIурар – хулари. Баджат фикир уйи мебурин чиппин игитвелар хьасмиде несиларихъди рукьасе пуна.
Ме дегIвин шигьидар кIина, хье арайиъ сад – Iуд дала андава. Гьелбетта агъай ве гъавурдиъ архьас агуна кканде пуна. Миштти сайисра дагурай мишттин зулуматарна Iайвелар, чIирхIе ният йиркIураъ ая инсанар рекъуьъра кехIей гьучидирхIурай. Амма кардихъди рукьугуна, хьес дегIви дагучира, ппара батIарди гъавурдиъ архьуне. ХIададари – хIабабари ахъакьу ахттилатар, мебурис агу гашарна – мекIер, гIезабарна – загьматар, чиппифас вахтт дахьуна фаттиву багу – кIиларихъди мебурин тамарзлувел мусра хум вере суманттар давуйи.
Хье Агъул райондиъра ппара ая гьемишттин хизанар.
Ватандин ХIа дегIвиъ Гъалибвел гъушуна муйцIур исахъ хъучархьай айчира, ме дегIвин иштаракчибурин хизанари, шиникквари, хуттулари кIвал аркьай ахъаркьа чиппин игит несиларин дженгерихъасна гьунарарихъас.
Фи пучира, фикир гуджлу э вахттунилас. Фи агъа чIал э ме? Вахттунин Iеламат э тегIди алттушуб, амма фикирдихъ хъара Iеламатин кар хъая. Ме э йиркIвариъ ппара гагьдисттегьен гъирхIуб. Ме Iеламати инсанарис мугьлат ирцIанде чиппин фикирдиъ ппара гагьдисттегьен зайдайи авалдин курарихъас ягIарвелар афухIас.
Хьес аргва, вахттунис са инсанра, са задра гIегвал давай, хIеракат киве алттвес. Вахтт фидегьен тегIди алттушучира, ушу исарин вакъиабур келлайиъ фикирдиъ амилгванде абадди. Хъара кьацIра кIвалас давереттар э дегIвин вахттарин вакъиабур. Фас пучин, шадвелдин вакъиабур мункин кар э фикирдиас аттархьубра, Iае курар, пушмалвел, гъамна – дард, йиркIуран Iуьр тегIди хум вере задар дава.
Хье алгъархьая несиларин хIа вазифа э ме вахттар йиркIварилас гьудатуб. Гьер са инсандис ягIай кканде, фи кьиматилди, загьматилди чиппин алттушу несилари къазалмиш акьуф ичин ме гъалибвелна ислехI зав, сакин дунья.
Гьемиштти гьалдис, мидегьен исар алттушучира, чиппин хIадад йиркIуралас гьатуна адава Агъул райондин Миссиарин хIуриъ яшамиш вея Гусейноварин хизандира. Мебури лап хIа зурба дамакъ фай ахъаркьа Гусейнов Джалал Сафаровичахъас.
Джалал Сафарович са агъзурна ерчIу вершна къана садпе иса Миссиарин хIуриъ хуне. БицIи Iуьмур мин ушуне, алтухъ иде- даваф хъудавайчира, сакинди. Идти ибгIайи, элхъенди, дурхIай. Махьтабиъ ме хуруне Типпигъарин хIуриъ. Са агъзурна ерчIу вершна ягъцIурна Iудпе исан февральдин вазала файшуне Красный Армин аскерарин джалгайигIди. Садпе гьужум мин хьуне Моздок шагьурдиъ. Хабди ме гьикуне Новороссийскдиди. Са агъзурна ерчIу вершна ягъцIурна хьибудпе исан январьдин вазала Джалал Сафаровичал йирхIунар хьуне. Ерхьи вазди Тбилисдин духттурханайиъ хьуне. Сагъ хьуxаб, хаб ушуне дженг дивас Краснодар шагьурдиъ, хабди Белорусиъ 117 стрелковый дивизиъ. Ме дивизиъ хабра йирхIунар хьуне. АцIуна хъая Гусейнов Джалалахъ джавизара. ДегIви ккиркIуна хулади адихаб, мис йине «За отвагу» агъа медальра. Къана гIуьфу исди кар акьуне хабди колхоздин председательвелди. Райком партин инструкторвелра акьуне, са иса исполкомдин ОКХйиъра кар акьуне. Совпартшкола агъафра хуруна ккиркIуне. Муя шиникквдин дад, цIеерхьи хуттулан хIададра хьуне.
Са чIалалди, дегIвин исар ккиркIухаб, Iуьмур учин рекъуьъ ай ушуне.
КIине Джалал Сафарович са агъзурна ерчIу вершна ерчIцIурна ерчIудпе исан къана ерчIудпе мартди.
Ме курар ягIай кканде, ме ягIарвелди цIае гъалатIар дахьас эхIттият йисе!
Салихат Малагусейнова
