Исан вегIдабурикес цул ке батIар, ке девлет вахтт э. Цулана тIабиIетис ери
ранг йирхIуна аве, хуппурил мехIсулар, кIурарил гьер джурейин емишар
бегьем вере вегIда э. Ми вахттуни бегьем вере емишарикес сад э нар. Нар
фи емиш ичин, фиштинф ичин хьес джаллбурис ягIа. Тарихди нар хIисаб
аркьа лапп дагь заманайихъас хаб ая емиш. Кьуран китабиъ кIвал акьуная
емишарикес сад э нар. Хъара агъа Адамна ХIевайис (гI.с) джаннатин
яратмиш акьу емишарикес сад нар э. Мишти идегуна, нар хIисаб аркьа ке
ухьтан, инсандис хайир кея джанаттин емиш. Гьелбетта медицинайира хIекь
аркьа ме емиши кея хайир инсандис.
ГIелимарин хIисабарилди, сифтта ме кIур узуне Персия агъа хIуькуматиъ.
Хабди мисаас ушуне багулив фая хIуькуматарири- Индиди, Египетдиди,
Азербайджандиди, хъараТурциди. Агъа, хье дуньяйин яратмиш акьуная
емишарин кIурарикес ке ппара гагьдинф хIисаб аркьая нардин кIур.
Амилгванде ме кIур верш исарихъди рукьуна. Гьававелар ме кIуранин
верефе 5-6 митIридегьен. Бегьем ве нар цулана, са кIурани ирцIанде мехIсул
50-60 кг рукьуна. Ме кIуранин емишар хъучархьугуна агубарис ке батIарттар э
джалла емишарикес. Варталас батIарвел кидавай, гIан хъара ухьтан э
нарун.Пай акьуна къуттурфучин, мин ударар багьа къашар суман аргва.
Агъа, кIилил аликIа коронайин кIалибар сифтта чишна акьуне нарун
ухшарарис кьуттурфуна. Фас пучин, нар Iу пай акьугуна ухшар ве корона
суман.
Ппара муфиIет кея нарукес джандин сагъвел ухIас. Инсанди хIапай
ишламиш аркьа ме емишин ударар. Хъучархьуная нарун ударар бицIиди
Iучи айчира, амма джалллабурис кьабул вере емиш э. Ппара хайир кея
давление ппара аттарис, иъ чукь аттарис, йиркIв иттаттарис, дамарин
четинвел аттарис. Хъара нардин удараригI гIая ппара витаминар, инсандин
сагъвел ухIас лазим вереттар.
Сайиштти нар ве ишламиш акьас шараб акьуна, салатаригъ гIархъас ,хъара
сасра джурейин ямагаригъ ишламиш акьас. ЭхIтиятилди ишламиш акьуна
кканде ая къарфун иттаттари. Фас пучина, мункин э дадуьхьуьб. Ме
кардихъас ахттигьар гъушуна кканде духттурарифас. Фидегьен муфиIет
кейчира, дагIай, хайир хьасе пуна ишламиш акьу емиши мункин э зиян хьуб
сагъвелдис.
Нардин ударарикес суман, хайир кея гIана ая джарарикесра.
Са са милатарин ая гIедатар, хIаягъар багъиш акьунаттар гьеме емишис.
Къаджарари гьер иса октябрь вазалан ахиран ягъа аркьа хIа мегIракабур.
Миштти идегуна, гьер са нигIмат хьин ишламиш аркьай кканде хайирдис.
Наибет Гасукаева