Ахиран вахттари хье хIуькуматиъ ппара цIае джурейин къанунар, программабур адихьуная. КIилди мебур адихьаф хIуькуматиъ ватанагьлибурин Iуьмурдин шартIар авадан хьурай пуна э. Гьер цIае иса хье хIуькуматтин хIатти хабар аркьа хIуькуматин къанунарин, госпрограммайин духIубвеларихъас.
2012-пе иса адихьу «Земский доктор» агъа программайихъас хьес дахи унихьуф э. Программайин мегIна духттурарин кьитвел ая хIурариди кар акьас кьастт ая специалистар гьикуб. Гьеме исан сифтта кIилин вахттари димари духIуба хьуне программабурин шартIар. Гьер иса ме программайин мебур духIуба аркьа иджвелихъди.
Садпеф, ме программайилди хIуькумати пулун кумак аркьа духттурдин, фельдшердин, акушерарин пеша фая джигьил специалистарис, кар акьас варха мукьариъ ая районарин хIурариди вес разивер йиттарис. Кар акьуна кканди ая гIуьфу иса. Кар аркьа гагьдигьен мебурис эркьва мукьра ирцIанде. Сифтта кIили ахттигьар уйи джигьил специалистарис, 35 исан яшарихъди рукьуна. Кьанди 2022-пе иса ме программайин шартIар духIуба хьуне. Кар аркьаттарин яшар гъадивуне, ахттигьар йине 50 ис хьасттегьен, хъара кар аркьа вахттра ирхе акьуне 2024 исасттегьен.
Гьемиштти духттурарин кIитвелар ая хье Агъул райондин хIурариъра. Буршагъарин хIур Агъул райондин варха мукьуйиъ э аяф. Духттураринра мегIелимарин кIитвел ая мисаъ. Алттушу иса ме хIуриди кар акьас «Земский учитель» агъа программайилди адине биологин дарсар ирцIан мегIелим. Ме исара «Земский доктор» агъа программайилди Буршагъарин хIуриди кар акьас адине Исмаилова Iейшат Магомедганифовна.
Iейшат Магомедганифовна хуф э Агъул райондин Цирхьеарин хIуриъ. Хизан мебурин ппара хIаф дава. Хьибу чина са чу. Айша мебурикес ке хIаф э. Дад Цирхьеарин хIуринф, баб даргибурикес э Дахадаевский райондин Дирбагъ агъа хIуриас. Iейшатан гIуьфу ис хьугуна, мебур айчIуне Цирхьеас Дербентский райондин Чинар агъа хIуриди. Махьтабарин хурубар Iейшата ккиркIуне Чинарди 2018-пе иса. КкиркIуфна сад гьеме иса учIуне ме хурас Волгоградский медицинский колледждиъ фельдшердин пешавелди.
Хурай ами Iудпе курсуниъ, ме хъучучIуне кар акьас «Реабилитационный центр для детей инвалидов и особенностями развития» агъа мукьуйиъ. Хабди ушуне кар акьас Волгоградиъ медицинскоий скорый помощьдин бригадайиъ. Гьеме мукьуйиъра гIешкъунилди са иса кар акьуне ми, ме кардикесра таджрибара хьуне мис. Найич уч ушучира, йиркIв хъавейи пуне ватандихъ.
Iейшат Магомедганифовнайи чIаларилди:
«Кар акьас ушучин, вере мукьар зас ппара уйи, амма зе гIешкъ хьуне гьеме «Земский доктор» агъа программайилди кар акьас. Ме программайилди кар акьас лазим иде кIеджар завал акьуна зун йине алтушу иса. Хабди зас хабар йине Агъул райондиъ Буршагъарин хIурин ФАПдиъ гьеме «Земский доктор» агъа программайилди кар аркьа духттур лазимди ая пуна. Зе кьасттра и гьеме шартIарилди кар акьас, хъара зун хIисаб аркьа хье миллатис кумак акьуб ме ухьттанвел э. Чин бицIи ами час дадара, бабара агъафи, духттурдин пешана мегIелимдин пеша рахIимлу кар э пуна. Хьес джаллабурис ягIа, дадар бабарин чIал шиниккварис хIа э.
Миштти идегуна, чин Iу ччиччи гIаттивуне сайи духттурдин пеша, сасрайи мегIлимдин пеша. Ке бицIи чи мехIелдис махьтабариъ хурай аме. Гьер инсандин учин кьастна гIешкъ хьуна кканде аркьа кардихъди. Миштти пуна гьеме иса февральдин вазала зун башламиш акьуне кар акьас Буршагъарин хIурин ФАПдиъ. ЯгIайин ягъас зас йиная эркьва мукьра, хъара нагаь лазим вере вахттунис улакьра. Зун ппара разиди ая зас мишттин мукьуйиъ кар акьас мункивел хьуб. Гьалдихъас хабра зе фикирдиъ ая гьеме пеша давамлу акьас, зас учис ачмиш акьас кканди ая гьемишттин инсанарис хайир рахIимлу аркьа мукь. Мишттин кар бегьем акьуб зе кьастт э».
Наибет Гасукаева
