Авал вахттарилас мич дишегьлис агъафе хулан хазина. Мин вазифа хIисаб аркьафи хулан мац, баракат, нуьхIуьбат ухIуб, валадар ухIуб. Идемин вазифа хIисаб аркьайи хулан хизанарис сурсат хъучакьуб, дуламиш акьуб.
Мин загьмат хIа и. Iурд, гIул дагъай, хизанар дуламиш хьас ме айчIуна кканвейи байирдиди. Дишегьли ми хулади файдеттин эвел аркьафи. Хулан мерттхьун, вахттуни ямаг хIезур акьуб, шиниккварихъ хъуттурфуб, маларин къайгъу акъуб, байирдин кар — гьемисал ккиркIвафи дишегьлин вазифабур. Ме алтухъ гъургъуна, мин чIал ахттилатигI гъачихьуб дурус хIисаб аркьаф давуйи.
Исарилас исарилди гьер баба учин руш вардиш аркьайи ме джурейис, мишттин фикирарилди. Гьал, вахттар ккетвей, инсанарин фикирар духIуба хьуная. Ягъайин ягъас дишегьли гIадава кар адава. Барамбарди идемарихъай лиханде мебура. Кканчин хIуькуматин кардил, кканчин байирдин кардил. Авала, гIевам вахттари, алтухъ хурубар адава арайи, дишегьлин матлаб Iари идемин чIал фацуб и. Агьал дадар-бабари бицIи ами димари ппара хIа фикир ирцIанде шиниккварин хурубарис. Руш, кIиркI агъайдава, гьерттис чиппивас аттрукьугъилди хурубан бицIиф ичира кIедж гъушанас алучIа. Фас пичин, дунья читин хьуная, багайин ягъ фиштти хьас ичин сайисра ягIайдава, фи ягъ-Iуьш адичира, дишегьливас учис гунин кьурц къазамиш акьас хьасе. Ягъа, ме читин дуньяйиъ, дишегьли барамбарди хулан кардихъай, арайил аркьа шиникквара, хIуькуматин кара. Са багухъас фикир акьучин, агьал инсанарис ппара мункинвелар ая чиппис фиштти кканчин дуламиш акьас. Фидегьен цIае пешабур аттархьуная гьалдис ,кьацIра фикирдиъра адаваттар. Ппара хIа кумак хьуная ме кардис интернетар. Агьал дишегьлибури, шибери экьуна хулариъ, интернетариас аркьа чиппин курар.
Са багухъас ппара рехIет э. Сасра багухъас зарара ппара кея интернетикес. Сайи учис иджвелин багухъас ишламиш акьучин, сасрайи Iайвелис аркьа. Миштти идегуна, агьал кегъархьая шиниккварис ягъди ахъаркьай кканде дадар-бабари микес кея иджвеликесна Iайвеликес.
Фикир акьучин, агьал адава пешабурин джуребур адава. Гьалдис Iари идемари кар аркьа усариъ, гьал дишегьлибура ая. Гьананра фикир вейдава, дишегьли фас гIафе мисагI пуна. Авала авефи дишегьлис хъудуьхьу пешабур э агъай духттураф, мегIелимдиф.Агьал кканчин космосдиди агъаве дишегьлибур, президентвелди гIаттива, гьер усариди гIачучIа мебур сесар ирцIан усариди, машинарихъ, поездарихъ кар аркьа. Са чIалалди, пеша кея инсан, кардин гъавурдиъ ая дишегьли, идеми дапуна, кьабул аркьа курарил.
Ме багухъас фикир акьу вахттуни, иджи аргва хьес, амма ая сасра багвра. Дишегьлин гъилиъ хIавел архье вахттуни, сара мин гьава джуре ве. Хулаъ ая идемилас дишегьли ппара къазамиш аркьа вахттуни, мебурин арабуриъ архьа. Идемис уч хIисабикк ккидавай фарцанф суман ве. Джалла идемаривас гъадивас вейдава мишттин гьава. Ме кар бадала хабди далгъванде хизанар. Ахиран вахттари ппара хьуная джуре хье хизанара. ХIапай мебурикес джигьилар э. Садпе багьана, агьал дадар-бабари шиниккварис гьер са кардис ирцIанде кумак. Чиппин кIилилди атуна, фикир акьуна алчархье читинвел арайил акьас артай адава. Хабди хIа хьуна, чиппин хизан хье арайи, фиттисра хъучудуркьуна аве шиникквар. Фи кар алчархьичира гьуккай ве бабарилди. Мебури, фиттин дарди-бала ичин арайил дакьуна, ке удигьай чиппин валад кегъдивай сасра кейхьай гъургъа. Рушан багухъасра, дузди Iекьул кея чIал пас алучIайдава, тегIди хьуна, завал акьуна шейэра, аттивас алучIа. КIилди ме курарин къалат инсанарин гъилиъ ая пул э. Пул хъая инсандик кеве фурс, дамахъ, къудурвел, гIентIи аркьа шиникквара. Джигьилвелар, къудурвелар алайшухаб, илгванде пушмалвел. Фас пичин, хIа вередегьен гъавурдиъ ачархьа инсан, хулахъ, хизанарихъ хъучархьаф адаваф. ДехIела э агъаф, фиттинра миндавай кьайда ягIай кканде пуна.
Луиза Гусукаева
