Мус хьучинра хIурариъ ая инсанар гIедатарис цIуппеттар э. Хье хIабабар-хIададарин заманайихъас хаб аяфи гIедат варха хIуьчIансуз мукьариас адиная инсандис нае миллатинф, фи диндинф ичинра хъуттудурфуна ппара хIуьлмат акьуб.

ГIедат суман хье диндиъра агъа гIалашувас хIуьлмат акьуб савабин кар э пуна. Авала вархалас аде инсан нагагь хIуриъ багунф адавахаб, вейи хIурин гимилди. Фас пучин гимил нае вахттуни ушучинра идемар завал хьуна авейи. ГIалашуй гимил эркьвафи учигьди хIурин хIа инсан гьучадистегьен.

Ге инсанди гIалашуй хъатгъарефи учин хулади. Файде гIалашувас хулан хIатти хIезур аркьафи ке батIар ямагар, Iуьш аркьахаб гис хIезур акьафи батIар суман гIаттивуная тавурхал. ГIалашуй ая хулаъди алчаверефи къуншибур, хулан гIаттин багун-кIилинттар, ге адиная инсандис хIульмат акьас, нагагь хIуриъ дагIа хабарар аяхаб ягIархьас.

ГIалашуй хье чIал дагIаф идехаб гин удигь хье чIалалди гъургъафдавуйи. Хьибу ягъди гIалашувафас хабар гъуландавуйи фи кар ай адеф ичин. Хье мисала аяфе: «Дахьурай хулаъ гIалашуй адава ягъ».

Хулаас аттушуна верегуна гъил Iари гьикафдавуй. БатIар савкьатар йина рекъуьл аркьафи хулаас. Нагагь хулан хIаттилди хаб ге гIалашуй адичин гебур вейи цIуппе гIулар.

Наибет Гасукаева