Культура агъа Нацпроектин рамкабуриъ ай А.Тахо-Годин ттур але РДйин миллатарин музейдис йиная 14 интерактивный доскабур, алийиная интерактивный гид. ЧIукь дахи суман гьаме проектилди арайил акьуне цифровой оборудованибур Дагъусттандин П.С. Гамзатовайин ттур але изобразительный искуссвойин музейдиъ, Дербентин историко – археологический хъара археологический музеяр-заповедникариъ. Ме кардихъас информагентствойис ахъакьуне РДйин Минкультурайин пресс-службайи.

Культурайин ирсдихъ хъуттурфубан рекъуьъ кIилдибурис рехIет аркьа – ягIайин ягъа Культура агъа национальный проектин ке хIа задачабурикес сад э. 

РДйин культурайин министр Зарема Бутаевайи ул ачатуне Тахо-Годин миллатарин музейдин цифровизациъ. Ме хъуттурфуне цIае мультимедийный гидъди фиштти кар аркьайчин. 

Пешакурарин ахттилатарилди, интерактивный деликар, экскурсибур ая вахттунис лап хIа кумакчибур хьасе. Фас пучин, мебуриъ завал акьуная кIилди хье ватандин тарих. Нае асирдиди кканчира ачушуна учис тамаша иде, нандиъра экспонатарихъ хъуттурфанас са четинвелра андава ме музейдиъ. 

Министрдис ахъакьугъилди, гьер экспозиционный залдиъ са интерактивный экран ая. Мисаъ гьер са экспонатихъас бегьем мегIлумат аве. 

Мисаъ завал акьуная 19-пе асирдин ахир кIиларин, 20-пе асирдин сифтта кIиларин деликар. Гьер миллатарин кунар, лекар, захрафабур, къабар, ттурар, кьвадилкьванар, хъара джуьре задара.

Зарема Бутаевайи пуне: «Гьал хье музеяр хIезур э цIае форматилди агьалдин вахттуниай кар акьас. ЦIае технологибурилас асул э музейди ушу инсанарис чиппин чангаъ аяттар суман удигь агвасе экспонатар».

Ме ис хье Президенти тастикь акьуная «Год народного искусства и нематериального культурного наследия народов России» пуна. ДехIела ме рекъуьъ цифровизация давам акьасе.

Салихат Малагусейнова