Ме иса хье республикайи йицIудпугулай акьуне гьер иса 15 сентябрьдиъ аркьа Дагъусттандин халкьдин садвелдин ягъ. Ме хIаягъ джигьилф э, арайил хьуф э региондин халкьдин хибудпе Съездил, хье миллатар са усал хьурай пуна завал акьуна ая усаъ. Ме ягъа хье региондиъ вахадну акьуне. 15 сентябрь гIаттивуна аяф гьакIанди дава, ме ягъа 1741 иса дагъусттаншувари гьишас акьуне Надир-шахдин къушум, хье вилаят фацанас кканди аяттар.
Хье гIедатарилди ме ягъа шадвелар аркьа джалла Дагъусттандиъ. Мебур э лихъунар, мегIнибур, бехIсар фуш зурба ичугас, хъара сасрабура. Мактабарикк ккеяттари аркьа дахъу дарсар, авалдин шейъэрихъас ахъаркьай.
Ме иса хIаягъ акьуне алтухъ инсан завал даверегъилди са мукьуйиъ коронавирус агъа иттал кеттдишас инсанарис.
Ягъ хъучIучухаб Дагъусттандин хIатти Сергей Меликова мубарак акьуне хье джемеIетис ме хIаягъ.
«Хье халкьдин садвел агвар акьуне 1741 иса сасра джиларилас хьин фацанас адина аяттарихъай укъугуна, зурба гуджус мутIегI дахьуна, хье хIададар гъузугуна джуван джилихъас, душмандис дарс йина игитвелдинра сайи сасрайис кумак акьубан, адикуна ун дахъуна адина ая гIалашувар», — пуне Сергей Меликова.
Ме ягъа Сергей Меликова наградабур йине гьер мукьариъ кар аркьай ай чиппин зурбавел агвар акьу иджи лихан инсанарис. ГебуригI гIай уйи духттурар, мегIелимар, спортсменар, мартабар гъадиваттар, хъара сасрабура. ГебуригI гIай уйи хье агъул дишагьлира Байранкиз Зумратовна Рамазанова. Ме дишагьли 20 исалас вартт учин Iуьмурдиъ кар акьуная агъуларин райондин Буршагъарин СПК «Буршагский» агъа идарайин хIунивар узай. Ми зурбавел акьуная ппара литIрибур неккдин узай, ккерхъаттрин дуздин къайдабурна дуздин вахтт фацуна. Мис Дагъусттандин хIатт йине учин ттуранихъас сеIет.
Хуф э Байранкиз Зумратовна 23 майдиъ 1979 иса Буршагъарин хIуриъ.
«Хуф э зун хье авересуман хизандиъ. Баб и зе хIунивар узаф. Че хизандиъ уйи 7 инсан. 1997 иса зун ушуне шувас, 2001 исалас зунра башламиш акьуне хIунивар узас. Агьал зе ая къайдайин хизан: зунра, шуйра, хьибу шиникквра, гебурикес Iуд шибер, сад кIиркI. К Хъая захъ Iу хуттулра. Дада кар аркьайи че хIуьппехъенвелди, агьал ги строительствойиъ кар аркьай ая. Учин вахттуни зафас хурас учIас хьундава, дадар – бабарис маджал адавуйихIела. Шуй зе маларихъ хъаяф э Iурдана галариъди, гIулана сувариъди вей. Захъ Iуд чияра хъая, Iуд чуппара. Чуппари ОМОНдиъ кар аркьая, чияр шуварикк ккеяттар э. ХIунивар узай дояркавел акьас рехIет давуйи, 2 ис хьу шиникквра хъай. Ме кардихъас зас ппара кумак хьуне зе багун кIилар. 20 истти кар акьуне дояркавелди, гьал зун кар аркьай ая санитаркавелди МЧСдиъ»,- ахъакьуне зурба дишагьли.