ДжемеIетин садвелна дусттвел нае савкьатилас кканчира багьа э!
Гьер са хIуькуматин Iуьмурдин тарих кьацIра хъаттдартIа тикрар э. Тикрар э мебурин халкьарин курар — лихунар, къанунарна — гIедатар. Хъаве гьерса хIуькуматихъ, хIурихъ, хулахъ чиппинттар иде ХIаягъарин ягъар.
Хье хIуькуматихъра ппара хъая гьемишттин ХIаягъар. Мебур кидавай гьер са республикайихъ, региондихъра хъаве Iари чиппин иде хIаягъар.
Гьемиштти хье Дагъусттандихъра хъая учин гIедатар, къанунар, ХIаягъар. Мебур ке ппара хъаяфра Дагъусттандихъ хьасе. Фас пучин ке ппара милаттар къвал къвалуъ ай, чIал сад ий, сад — сайин панагьар суман яшамиш вереф мисаъ э. ХIисаб дивучин Дагъусттандиъ ягъцIурахъ хъучархьуна миллатар яшамиш ве. ЯгIа туристарис рекъер ачухъ акьу вегIдайи ме миллатарин сан гIуьфцIурарихъра хъучархьай ахьасе.
ХIаягъарихъас гъургъучин ая мебур лап дагь заманабурихъас мич хъаяттара кьанди арайил акьуттара. ЦIайи арайил акьу ХIаягъарикес сад э Дагъусттандин джалла миллатарин садвелдин ягъ. Магьа ттиъ цIехьибудпе ис э республикайин тарихдиъ ме ХIаягъ хьин къаршиламиш аркьай. ХIаягъан ягъ 15 сентябрь э.
Дагъусттандин миллатарин садвелдин ягъ джигьил ХIаягъ э. Ме кардин къанун кьабул акьуне цIехьибу исан удигьай региондин миллатарин Хьибудпе Съездил. Съезд завал акьубан мегIнара ппара миллатар ая республикайин джемеIет сад акьуб и. Хье ватанин вакилари икьрар акьуне тегуна ме хIаягъ акьучин ппара идже хьасе пуна. Фас пучин мебурин фикир и ме ХIаягъа хье халкьарин садвелна гIедатар афухIасе пуна. Республикайин тарихдиъ ппара хье ватанагьлибурин йиркIуран зурбавелна игитвел хум душуб бадалди арайил акьуттар. Гьемишттин вакъиабура зейдайи хъая хье халкьарихъ. Хье халкьарин гIедатар, алттушудегьен курар, кьадар — кьисматар, Iуьмурдин рекъра кехIей сад э. Дагъусттандин халкьар векIехI инсанаре. Ме кардил хьин ппара шад э.
КIвал акьучин, Дагъусттандин садпе Съезд хьуфе са агъзурна ерчIу вершна къадпе исан цIехьибудпе ноябрьди Буйнакск (Темир-Хан-Шура) шагьурдиъ. Iудпеф хьуне са агъзурна ерчIу вершна ерчIцIурна Iудпе иса, хьибудпеф Iу агъзурна йицIудпе иса.
15 сентябрь нехIекьди дава гIаттивуф. Ме ягъ Дагъусттандин тарихдиъ мусра кIвалас давере ягъ э. Са агъзурна ери вершна ягъцIурна садпе исан гьаме ягъа хье игит Ватанагьлибури Дагъусттан азад акьуне Надир-шахдин кьушумиккес. Хье ватан чиппин гъили гъушасе пуна аде душман зир — зала хьуна гьишас акьуне.
Гьал гIедат идегъилди ме ягъ машгьур э республикайиъ лап зурба хIаягъ суман. Гьемиштти зурбадалди къаршиламишра аркьа хьин ме ягъ. Аркьа концертар, спортивный мегIракабур, хье миллатарин гIедатарин бехIсар, ярмаркабур, хъара джуьре мегIракабура. ГIилминра научный идарабури ме ягъа аркьа открытый урокар, тарихдин экспедицибур, ишкиларин — китабарин выставкабур.
Миштти ичира ке хIа мегIрака ме ягъа ве джалла республикайин машгьур артистар гIая концерт. ГIедат идегъилди ме концертигI ишттарак аркьа хье республикайин хIа гьулари, общественный, политический деятеляри, журналистари.
Мишттин мегIракабур аркьа гьер районарин джемеIетари чиппин бицIи халкь бадалдира. Хье гьер са инсандин вазифа э ватандин тарихдиъ ая мишттин ягъар, зурба вакъиабур хум гьадатуна чиппин валадарихъди, валадарин валадарихъдира рукьас акьуб.
Салихат Малагусейнова