11-пе октябрьди дагъусттандин вакилар Правительствойин Председательдин заместитель Муслим Телякавов кIилил алди ушуна уйи Бакуйиди. Мисаъ мебур аларуцуне ттур ая инсанар икIу некьварил. Азербайджандин садпе президент Гейдар Алиеванра, гин хьиран, ттур ая уларин духттур Зарифа Алиевайин некьварил мебури алийине тукар. Хабди Дагъусттандин вакилар ушуне Дадарин ХIа дегIвиъ кIина аскерарин памятникдилди. Ме памятникдик йирхIуна ая Расул Гамзатован кьуркьар, кIенакк ликIина ая «1941-1945-пе исар». Мисалра хье вакилари алийине тукар.
Бакуйиди РДйин Правительствойин вакилар адинаф Дагъусттандин назумчи Расул Гамзатов 100 ис хьубан Азербайджандиъ аркьая мегIракайилди э.
Гьеме ягъа димари вакилар ушуне Iуьрус Хулади. Мисаъ мебур хъуттурфуне Кавказдихъас хьу дегIвиъ гъалибвел гъушубахъас акьуна выставкайихъ. Ме гъалибвелдин ттиъ хьуна ая 80 ис.
Ме выставкайиъ ая ишкилари хье дадаринра хIададарин игитвелнра зурбавел агвар аркьая несиларис. Джала выставкайихъ хъуттурфухаб, Муслим Телякавова чухсагъул пуне ме Ирек Зиннуровас, Iуьрус хулан хIаттис. Сергей Меликован ппаттаас ме хулас бахш акьуне Расул Гамзатован китабар. ЙиркIурал акьасе, ттиъ ме гъалибвелдин мегIракабур аркьаф Дагъусттандин хIаттин икьрарилди э.
Муслим Телякавовахъай Бакуйиди адине дагъусттандин хIаттинра Правительствойин пресс-службайин начальник Рашид Акавов, РДйин культурайин министр Зарема Бутаева, миллатаринра диндин министр Энрик Муслимов, Российин МИДдин вакил Махачкалайиъ Марат Османов, хъара Народный собранин депутатар.
Абдулрашид Рамазанов