Ттиан ис хье Российин Президентин Указилди ттур йирхIуна бахш акьуная Игитарин фикир ухIубасна машгьурвелдис. Ме «хIаягъ уларил негъвар алди» хьин къаршиламиш аркьай аве гьер иса. Хье хIуькумати варха, са агъзурна ерчIу вершна ягъцIурна садпе —  ягъцIурна гIуьфудпе исари лап кьадар — хIисаб адавадегьен хIа кьимат йине ме Гъалибвелдин ХIаягъ къазамиш акьас. Ме хIа кар бадалди миллионарилди хье ватандин инсанари кIилар алийине гьужумдин чуларил, агъзурарилди хизанар пуч хьуне немцарин гъамазчибурис чиппин азадвелна хал мукь агвар дакьуб бадалди. Ме курарин иде – дава санар ихьуная «Вести Агулайин» сайтуниъра.
Фи акьучира, фиштти хьучира ме курарихъас хьин мусра кIвалас гьатуна ккандава. Ме игит джемеIет хье йиркIвариъ хьин гьемишанди ухIай кканде, мебурин ттурар хьин гьемишан гъагьалцай кканде гьер са ватанагьлихъди, бицIиттихъди, хIаттихъди рукьас акьас.
Хье бицIи ватан иде Агъул райондиас мишттин игитарикес сад э Ашурбек Исаев. Ашурбек Исаев са агъзурна ерчIу вершна цIеерхьидпе иса ме райондин Миссиарин хIуриъ хуне. Са фиттикесра хабар давай, учин багайин ягъ аркьай суван ватандиъ ая инсандин Iуьмур са дакьикьайин арайиъ лап гъадаркуне. Са агъзурна ерчIу вершна ягъцIурна Iудпе исан йицIудпе майди ме Хивский райондин военкоматиас унахъуна Совет хIуькуматин армин джалгабуриди файшуне.
ЦIайи хьуне ме Ростов-на-Дону агъа шагьурдиъ, ягъцIурна ерхьидпе дивизиъ, хабди Моздок шагьурдиъ рядовой стрелоквелди. Сагелай, немцари аларуцуна фацу вегIдайи, йирхIунар хьуна, архьуне ме душмандин есирдиъ. Амма немцарин лагерьдиас мивас Iеламатингъилди гьишас хьуне. Гьиши вахттуни, Исаев ачархьуне партизанарин къана ерхьидпе бригадайин отрядиъ.
Са агъзурна ерчIу вершна ягъцIурна ерхьидпе иса хаб адине учин бицIи ватандихъди – уч ху хIуриди. Жданован ттур але колхоздиъ лирханди ушуне мин аме Iуьмур. Тарбия йина ухIуна, арайил акьуне ерхьи шиниккв.
Са агъзурна ерчIу вершна ерчIцIурна ерчIудпе иса Ашурбек Исаевич кIине. Амма инсанарин фикирариъ ме инсан амилгвасе асирарилди.

Салихат Малагусейнова