Инсандин Iуьммур ме дуьяйиъ мегIнибуриъ агъафсуман са ягъ суман дала  вейдава, амма ахиран вахттари ме джикъе IуьмурдиракехIей аргва фиштти духIуба вей, гьуруцай айчин дуьнья.

Хьин ягIа дуьяйин технологибур фиштти духIуба вей айчи пасттава, хьин пасе хье дагьараригI Iуьмур фартай ме ахиран исари фи духIуба хьуна айчи.

Кьур узу вахттар лидегьен варха дава хьес. Хье келлабуриъ аме фиштти хьин хьидин кьур узай, цулин кьур узай чIире ху агъа мукьар авейдавуйи. Дузуна са фуниккендехIера гIатухаба уза хуппурин Iейибин кар и, калходин хуппурар, инсанарин хуппурар. Узай и тегуна калтуфара, амма сачIукь. Хьеттар вардиш и мехIулар узай, гIуй узуб хьеф дава агъайи.

Са вахттара ушундава, мехIсуларна гIуяр узуб барамбарди хьуне.

ГIуяр узуб рехIети аргвайи, гIурара уджуз и. Хуппай хьуне калтуфар пара узай мехIсуларилас, Iайи читин мукьар узас, артай хьуне дузай (чIири). Улар алакьуна дахъасра хъучадархьуна гьалдин вахттари узуна мехIсулар темехIисракехIей фачархьайдава, улисдехIера аргвайдава ул хъадихьасра. Те вахттари хьехъ хъуйи ризкь агуна гулуне.

Агьал мишттин шикил хьуна ая хье хуппурарин, джалла хуппурар чIире хьуна ая, саса мукьариъ узуна ая калтуфар авала суман. Удигь вегIдабури джалла мехIсулар хьуна калтуфар узаттар чIукьдала адавуй, гьал калтуфар узаттар гиштти чIукь аме, амма мехIсулар кеттархьуне, гебурин яринди хьуне чIире хуппурар сайира къайгъу даркьаттар. Сайи-Iуйи синар дивуна уцайчира амеусар фадахъуна ая хъучушуна уцасдехIера алдучIай. Тегуна гIарарихъас укъай авейи, гьал дихьи хъуьхъуьран кIунттакк ккея, машинин рекъра ая чIири ая хуппурарик тIубра кетай андава. Нахьи хье агъуларин игитар, хIейиф э мисалас алайшу зурба дадар.

К.Мирзоев.