Гъудагъарин хIурин идже хизанарин Iуьмурдихъас Кьушан – дерейиъ ая са идже маслихIетин къун суман хизанар – Алиханра Ашутай. Раджабов Алихан Раджабович хуная 1912 иса. Мактаб ккиркIухаб кар аркьай хьуная чиппин Кьушан- дерейиъ ая колхоздиъ.
1941 иса ушуная ге учин кIилилди дегIвиъди. 1945 иса, дегIви ккиркIухаб ацIун наградабура фай, ппара йирхIунара кей адиная ге учин
хIуриъди. Пенсиъди весттегьен колхоздиъ хIа курар акьуная ги Кьушан-дерейин гьер джуре хIурариъ. Гин хьирас агъафе Ашутай. Ге хуная 1918 иса.
Раджабова Ашутай Рамазановнара э Гъудагъаас. Ппара зурба хьир и ге. Лиханди колхозариъ чиппин дуламиш аркьайи гебури. 1979 иса гебур айчIуна хIуриас ушуне Дагестанские Огниъди. Гебуриъ хъай уйи ери шиниккв. Ке хIа кIиркI хуная 1937 иса, Абдулкадыр агъаф. Абдулкадыр Алихановича хуруная культпросвет училище. Учин хе хIуриъ кар аркьай уйи ги заведующий клубин 1974 исасттегьен. 1974 иса ге учин хизанара хъай айчIуна ушуне Дагестанские Огниъди. Гисаъ ги кар аркьай хьуне народный хозяйствойиъ гьер джуре курарил, уч пенсиъди весттегьен.
1946 иса хуне гебурис гIудафанар. КIиркIна
руш — Раджабна Кисрин. КIиркIакес хьуне хIа
духттур-хирург. Раджабов Раджаб Алиханович — заслуженный духттур республикайин, хирург высшей категории, член правления общества хирургов, почетный инсан шагьурдин Дагестанские Огни. Ппара идже духттур и ге. Хье агъуларин халкьдис ппара муфеIет хьунафе гикес. Гилди душу инсан иттархьуна, нагагьра адава. Джаллабури ппара хIа гаф аркьайи Раджаб Алихановичан. Ппара идже инсан и ге. Ппара кумакар аркьайи ги джалла инсанарис. Ге кIине 2018 иса инфаркт хьуна. Уч джаннатиъди ушурай. Учин гунагьар гIеф акьурай.
Кисрин кар аркьай уйи народный хозяйствойиъ Дербентиъ уч пенсиъди весттегьен. “Якьудпе шиниккв — Ашура хуне 1948 иса. Учин хизанара хъай ешамиш вея Дагестанские Огниъ. КIилин Iуьмурди кар акьуная Дагестанские Огни шагьурдин больницайиъ техобеспеченин службайиъ. Ге кIине 2020 иса.
ГIуьфудпе кIиркI, Рамазан Алиханович, хуная
1956 иса. Ги хуруная техинженерарин курсар.
Учин специальностин кар акьуная
кIилин Iуьмурди Дагестанские Огни шагьурдиъ. Ерхьидпеф — руш Зубайдат, хуная 1958 иса. Гера учин хизанара хъай дуламиш вея Дагестанские Огни шагьурдиъ. Ги хъиртIанде хье чIалан мегIнибур. Гин мегIнибур агьал аркьа ацIун агъуларин артистари.
Ке бициф, еридпе кIиркI — Курбан Алиханович хуная 1961 иса. Ги хуруная ДГМИ Махачкалайиъ. Хурун ккиркIухаб ги кар акуная хIавелди Гъудагъарин участковый больницайиъ. 1998 исалас кар аркьая дежурный хирургвелди ЦГБ Дагестанские Огни шагьурдиъ. Ме сеIети кар аркая медицинский центрайиъ «Гиппократ» Дербент шагьурдиъ — врач эндоскопист.
Курбан Алиханович ппара идже духттур э. Хье агъуларис ппара кумак аркьа ги. Ппара хIуьлмат кея инсан э ге. Агъулари ппара хIа гаф аркьа Курбан Алихановичан. Учин джандиъ сагъвел кам дакьурай, юркIурас рехIетвел хьурай. Ппара хьурай агъуларихъ гишттин идже зурбавел кея, учин кар ягIа инсанар, Раджаб Алихановичра Курбан Алиханович суманттар. Чугъсагъул хьурай чиппин дадасна бабас гьегишттин шиникквар хуна, ухIуна хIа акьуттарис. Дадра баб мебурин кIине 2004 иса Дагестанские Огни шагьурдиъ. Чиппин гунагьарин гIефа акьурай, джаннаттиъ мукь хьурай.
Нафият Шамсудинова
