Фикир  акьучин,  хIурарин хуппурари лихан вегIда  лидегьен  варха андава. Зарафат  дава,  хьид  багу вея.  Хуппуриъ, бусттанариъ курар   аркьа  вахттар  яваштти  хъучавея,  хье  мисариъ   хубжи  ибхьер   мекIер аме,  магьа  ягIара  угъая  ибхь. Авалан   вахттари  хье мисариъ   колхозариъ — совхозариъ  ацIуна  малар хIуппар  агуна,  хуппур узай амегуна, гебири  вазар ами  хъучучIафи  фурдар  ахъас хуппуриъ ибхIал акьас. Гебирил алгъузуна  авейи райондин хIаттар,  хъучадархьагуна  аркьафи субботникар  фермабириъ завал  хьунадегьен  фурдар ахъас  хъучикафи. Агьал  фие амеф,  са фера  кехIей,е фиттинра  ун андава, вец ухIаф андава, е маишаттариъ малар хIуппар  чIукь  амеф, загьмат акьас  кканди андава.  Хьирагъаас  200 манат  трактор  агъай  са  тюк  IуькIерин  гъуянде.   Чиланарира   параттари   чIире  акьуная  чиппиф фае  са парча  хуппур,  IуькIер  уца  гIарар  акьуная . Хьидин   узубара  дахьичин,  хабра хье  маларис  гъушуна  кканхьасе  сумарин  тюкар сад  200 манат  агъай.  Хьес  иджеф  фие  вахт-вахттуни  батIарди  хуппур даркуна узуб,  идже  мехIсул хьуна  кканчин. Ппара  узуна  кканефе  цулин  тумар,  гебирикес  муфеIет  ппара ая  фиштти  вун  хуппурихъ хъуттурфучин,   гьамиштти. Фидегьентар  пичира, вахтт-вахттуни  хуппурарихъ Ра хъуттурфанасе. Гьер  вахт-вахттуни  акьуна  кканде, батIар  мехIсул  гъушанас  кканчин.  Фишттин  ухьтан  хуппурар  са удра  кичадахъуна чIири ая. Удигь вахттари цалар ккекьуна хуппурар  хIа аркьайчин,  гьал  гван  аттара  ккетуна,  чIир йирхIуна, суьлен кьур  фи  гъа чIал  ичин  кIваласра  ушуна.